3 ივნისს ახალციხეს აშშ–ს ელჩი რიჩარდ ნორლანდი ესტუმრება

ამერიკის დღის აღსანიშნავად ხვალ, 3 ივნისს სამცხე-ჯავახეთის სახელმწიფო უნივერსიტეტში ამერიკანისტიკის კონფერენცია ჩატარდება, ღონისძიება 10:00 საათზე დაიწყება; 15:00 საათზე ახალციხის ციხეზე საინფორმაციო ბაზრობა მოეწყობა, სადაც გამოფენილი იქნება აშშ-ს მისიის საგანმანათლებლო, გაცვლითი, საგრანტო და სხვა პროგრამების სტენდებს.

ღონისძიების ფარგლებში მოწყობილ საინფორმაციო ბაზრობებზე წარმოდგენილი იქნება ამერიკის საელჩოსა და აშშ-ს საერთაშორისო განვითარების სააგენტოს (USAID) მიერ დაფინანსებული განათლების, დემოკრატიის განვითარების, ჯანდაცვის, სოფლის მეურნეობის, ენერგეტიკის, ეკონომიკური ზრდის პროექტები და მათი ბენეფიციარები. მოსახლეობას საშუალება ექნება საელჩოს წარმომადგენლებისგან პირადად მიიღოს ინფორმაცია საგანმანათლებლო, საკონსულო და საიმიგრაციო მომსახურების, სხვადასხვა გრანტებისა და დახმარების პროგრამების შესახებ.

18:00 ახალციხის ციხეზე დაიწყება კონცერტი - მუსიკალური ბენდების „Dangerflow“ და „Sea2Sea Dancers“ მონაწილეობით.

ამერიკის დღეებისადმი მიძღვნილ ღონისძიებებს ამერიკის შეერთებული შტატების ელჩი საქართველოში რიჩარდ ნორლანდი დაესწრება. ელჩს სამცხე–ჯავახეთის გუბერნატორი აკაკი მაჭუტაძე და ქალაქის მერიის წარმომადგენლები უმასპინძლებენ.

ღონისძიებები საქართველოს მასშტაბით 2 ივნისს ზუგდიდიდან დაიწყო, ახალციხის შემდეგ კი ღონისძიებები 4 ივნისს გორში გაიმართება. ხოლო 6 ივნისს თბილისში, რიყის პარკში ამერიკის დღეების დასკვნითი ღონისძიება მოეწყობა.

[sknews.ge]