ახალციხის მცხოვრებლებს უფასოდ გამოიკვლევენ

თბილისის რესპუბლიკური საავადმყოფოს 20–მდე ექიმი მოსახლეობას უფასო გამოკვლევებს 25 ოქტომბერს ჩაუტარებს. გამოკვლევები ახალციხის მეხუთე საჯარო სკოლის შენობაში ჩატარდება. რესპუბლიკური საავადმყოფოს ექიმები პაციენტებს დილის 10:00 საათიდან მიიღებენ. მოქალაქეების ასაკი შეზღუდული არ არის.

ინიციატივა ქალაქ ახალციხის მუნიციპალიტეტის მერიას ეკუთვნის.

„ჩვენი მოსახლეობისთვის სამედიცინო მომსახურება არის ძნელი, განსაკუთრებით დიაგნოსტიკაა ძვირი სიამოვნება. ამიტომ გადავწყვიტეთ დავკავშირებოდით ჩვენ მეგობრებს და ისინიც დაგვიდგნენ გვერდით“, – ამბობს ახალციხის მერი გიორგი კოპაძე და ამატებს, რომ შესაძლებელია მარტივი ოპერაციები უფასოდ ადგილზეც ჩატარდეს.

მსურველებს უფასოდ მოემსახურებიან: ოჯახის ექიმი, თერაპევტი, ნევროლოგი, ენდოკრინოლოგი, პედიატრი, ქირურგი, ოფთალმოლოგი (თვალის სრული გამოკვლევა სათვალის შერჩევა), ოტორინოლარინგოლოგი (ყელ–ყური), ანგიოლოგი (სისხლძარღვთა), რევმატოლოგი, კარდიოლოგი, გინეკოლოგი, ტრავმატოლოგი (ორთოპედი), უროლოგი, ალერგოლოგი, გასტროენტეროლოგი და ლაბორანტი (ანალიზები).

ასევე ჩატარდება: მუცლის ღრუს ექოსკოპია (ღვიძლი, ნაღვლის ბუშტი, ელენთა, პანკრეასი), საშარდე სისტემის ექოსკოპია (შარდის ბუშტი, პროსტატა, თირკმელი), გინეკოლოგიური ექოსკოპია (საშვილოსნო, საკვერცხე), ფარისებრი ჯირკვლის ექოსკოპია, მკერდის ექოსკოპია, კაროტიდების ექოსკოპია, ექოკარდიოგრაფია (გულის ექოსკოპია), ელექტროკარდიოგრამა, ქვემო ვენების დოპლეროგრაფია.

ახალციხის შემდეგ რესპუბლიკური საავადმყოფოს მედიკოსები კვირას, 26 ოქტომბერს, გამოკვლევებს ადიგენში მცხოვრებ მოსახლეობას ჩაუტარებენ.

[თინათინ ზაზაძე, ახალციხე]