პრემიერ–მინისტრის რეგიონული ტურნე სამცხე–ჯავახეთში

ირაკლი ღარიბაშვილმა რეგიონში ვიზიტი ჯავახეთიდან დაიწყო. მხარის რწმუნებულთან, აკაკი მაჭუტაძესთან ერთად, პრემიერმა სოფელ კარწახში მშენებარე საბაჟო-გამშვები პუნქტი დაათვალიერა. შემდეგ, იგი მარაბდა-ახალქალაქი-კარწახის სარკინიგზო უბანს ესტუმრა.

მოგვიანებით, პრემიერი ახალქალაქის სოფელ ჩამდურას მოსახლეობას შეხვდა. ადგილობრივები პრემიერს სოფლის პრობლემებზე ესაუბრნენ. მათი თქმით, სოფელს სარწყავი წყლისა და შიდა გზის პრობლემა აწუხებს, თუმცა სოფლის მხარდაჭერის პროგრამის ფარგლებში უკვე დაწყებულია სამუშაოები, რომლებიც წლის ბოლომდე დასრულდება.

ახალქალაქიდან პრემიერ–მინისტრმა ასპინძაში გადაინაცვლა.

„პრობლემებს ვერ მოვაგვარებთ, თუ სოფლის მეურნეობა არ განვითარდა. ადგილობრივი მეწარმეობის აღორძინება და სამუშაო ადგილების გაჩენა არის ჩვენი მთავრობის უმთავრესი ამოცანა. ხელისუფლების მთელი ძალისხმევა მიმართულია მეწარმეობის განვითარებისკენ“ , - განაცხადა საქართველოს პრემიერ-მინისტრმა ასპინძაში, სოფელ საროს მოსახლეობასთან შეხვედრისას. მან ადგილობრივების პრობლემები მოისმინა და მათ სარწყავი წყლისა და გაზიფიცირების პრობლემის გადაჭრას დაჰპირდა.

პრემიერმა ასპინძის მუნიციპალიტეტის სოფელ საროში მდებარე მთავარანგელოზის სახელობის ეკლესია მოილოცა. მთავრობის მეთაურს ახალციხისა და ტაო-კლარჯეთის მეუფემ, თეოდორე ჭუაძემ უმასპინძლა. მან პრემიერს მეექვსე საუკუნის ძეგლი და მიმდებარე ტერიტორია დაათვალიერებინა.

ასპინძის შემდეგ ირაკლი ღარიბაშვილი ბორჯომს ესტუმრა. აქ პრემიერმა მშენებარე სასტუმროები: „რიქსოსი ლიკანი“ და „ინტერკონტინენტალი“ დაათვალიერა. მოგვიანებით „ბორჯომის N1“ ჩამომსხმელ ქარხანას ეწვია.

ბორჯომში, პრემიერ–მინისტრი, რეგიონში მყოფი დიპლომატების პატივსაცემად გამართულ მიღებას დაესწრო. მან დიპლომატებს რეგიონის შესახებ ინფორმაცია მიაწოდა და შთაბეჭდილებები გაუზიარა.

დაახლოებით, 17:00 საათზე, პრემიერ–მინისტრი ახალციხეს ესტუმრა, სადაც მის სტუმრობამდე ჯგუფ „ქუჩის ბიჭების“ კონცერტი მიმდინარეობდა.

ამ წუთებში, პრემიერ–მინისტრი ახალციხის ცენტრში, მესხეთის თეატრის წინ შეკრებილ მოსახლეობას მიმართავს.

[sknews.ge]