შენც შეგიძლია გახდე თოვლის ბაბუა ერთი დღით!

"თოვლის ბაბუ, მენატრები ძალიან. მე კარგად ვიქცევი და გთხოვ საჩუქარი მომიტანო. ძალიან მინდა ფანარი, მატარებელი და თვითმფრინავი. გკოცნი“. „თოვლის ბაბუ, გეხვეწები მაჩუქე სათამაშო პიანინო“. „სანტა, ჩემი ოცნებაა ველოსიპედი, მაჩუქებ?“ „თოვლის პაპა, როგორ ხარ, ძალიან მომენატრე. საჩუქრად მინდა ტელეფონი, მართალი. შენი გოგო ასმათი“. "თოვლის ბაბუ, მე ძალიან კარგად ვიქცოდი და მინდა რომ მომიტანო პულტიანი მანქანა, მომიტან?“, - ეს ნაწილია იმ წერილებიდან, რომელიც მე-7 სკოლის მოსწავლეებმა თოვლის ბაბუას სახელზე დაწერეს.

სკოლაში სპეციალური საგანმანათლებლო საჭიროების მქონე 27 მოსწავლე სწავლობს. კითხვა - „მომიტან?“ - არაერთ წერილში შეგვხვდა... აქედან გაჩნდა იდეაც, ამ სკოლის მოსწავლეებისთვის ერთი დღით თოვლის ბაბუას როლი მოგვერგო.


აქციაში, რომლის ავტორი და ორგანიზატორი „სამხრეთის კარიბჭე“ იყო, ახალციხის არასამთავრობო ორგანიზაციები: დემოკრატ მესხთა კავშირი, ასოციაცია „ტოლერანტი“, ახალციხის სასოფლო-საკონსულტაციო სამსახური, ახალციხის ახალგაზრდული ცენტრი, ასევე: ადგილობრივი ტელეკომპანია „მე-9 არხი“, ახალციხის საგანმანათლებლო რესურცენტრი, ახალციხის სახელმწიფო-სასწავლო უნივერსიტეტის სტუდენტები, ასევე, მოქალაქეები: ნინო ლომიძე და ნანა ზუბაშვილი საკუთარი სურვილით ჩაერთვნენ.


ერთობლივად შეგროვებული სახსრებით, ორგანიზაციების თანამშრომლებმა პატარებს ყველა ის სურვილი აუსრულეს, რაც მათ წერილებში ეწერა. მოსწავლეებმა მადლიერება საჩვენებელი ინტეგრირებული გაკვეთილი-ზეიმით გამოხატეს, სადაც ყველა იმ უნარის და ცოდნის წარმოჩენას შეეცადნენ, რაც მათ სკოლაშ მიიღეს.

20 დეკემბერს, მეშვიდე სკოლის მოსწავლეებმა ირწმუნეს, რომ თოვლის ბაბუა არსებობს. ამისთვის სულ ცოტა რამ აღმოჩნდა საკმარისი: იდეა, მისი ორგანიზებისა და თანადგომის მზაობა და სულ ცოტა ფინანსები...

[ნინო ნარიმანიშვილი, ახალციხე]

იხილეთ ფოტორეპორტაჟი მე-7 სკოლიდან.