'ჩვენ არჩევნებზე სამი მტერი დაგვიპირისპირდება' – ვანო მერაბიშვილი სამართალდამცავებს მიმართავს

ვანო მერაბიშვილი საკუთარ თავს სამართალდამცველად მოიხსენიებს და ამბობს, რომ 31 ოქტომბერს „ქართული ოცნება-დემოკრატიული საქართველოს“ თავმჯდომარე ბიძინა ივანიშვილი ამომრჩევლების მოსყიდვას სამი ინსტრუმენტით შეეცდება.

„ყველა ჩვენთაგანის ცხოვრებაში არის დღეები, რომელიც წყვეტს ძალიან ბევრს - მომავალს, პერსპექტივას, საშუალებას, შანსს. ეს არჩევნები არის ძალიან პრინციპული, იმიტომ რომ ამ დღეს ჩვენ, სამართალდამცავებს გვიპირისპირდება ჩვენი სამი მთავარი მტერი - მოსყიდვა, კრიმინალი და რუსი აგენტები.

ჩვენ ამ ერთ დღეს ან დაგვამარცხებს ივანიშვილი ამ სამი ინსტრუმენტით - მოისყიდის ქართველ ამომრჩეველს, კრიმინალები დააშინებენ ხალხს და რუსი აგენტები განსაზღვრავენ პოლიტიკურ დღის წესრიგს, ან ჩვენ, ყველა ერთად დავიცავთ ჩვენი ხალხის ნებას და ვუზრუნველყოფთ, რომ საქართველოში აღარ დადგეს საფრთხე არც მოსყიდვის, არც კრიმინალის და არც რუსეთმა გადაწყვიტოს საქართველოს ბედი“, - განაცხადა მერაბიშვილმა.

აღნიშნული ვიდეო მიმართვა ყოფილმა შს მინისტრმა 26 ოქტომბერს გაავრცელა.
საქართველოში საპარლამენტო არჩევნები 2020 წლის 31 ოქტომბერს გაიმართება, ამ დღეს მოსახლეობა მეათე მოწვევის პარლამენტს აირჩევს.

[მარიამ ბარძიმაძე]