ქვეყანაში კორონავირუისით ინფიცირებული პაციენტებიდან 18–ის მდგომარეობა კრიტიკულია

დღეს, საქართველოში კორონავირუსით ინფიცირების 259 ახალი შემთხვევა დაფიქსირდა.

„ინფიცირებულების გადანაწილება რეგიონების მიხედვით ასეთი გახლავთ, კვლავ ყველაზე მეტია აჭარაში, სადაც 164 ახალი შემთხვევა დაფიქსირდა, თბილისში – 34, იმერეთში – 22. სამეგრელო–ზემო სვანეთში გახლავთ 15 ახალი შემთხვევა, გორში – 1, მარნეულში – 1, მცხეთაში – 1, საზღვარგარეთიდან იმპორტირებულია ხუთი“, – განაცხადა მარინა ენდელაძემ.

მისი თქმით, ამ დროსთვის ქვეყანაში 18 კრიტიკული პაციენტია. ამბობს, რომ შემთხვევბის მატების მიუხედავად, საგანგაშო არაფერია.

„ამ მატებას ჩვენ ველოდებოდით. მინდა დავამშვიდო მოსახლეობა სისტემა გამართულია, უკვე მიმდინარეობს სერიოზული მუშაობა ამ საკითხთან დაკავშირებით. შევძლებთ ამ პაციენტების მართვას“, - განაცხადა ენდელაძემ.

კორონავირუსის დადასტურებულ შემთხვევათა რაოდენობა 4 399–მდე გაიზარდა, მათ შორის გამოჯანმრთელდა 1 705 პაციენტი. კარანტინის რეჟიმში 5 390 მოქალაქე იმყოფება, სტაციონარში მეთვალყურეობის ქვეშ - 836.

კოვიდ სასტუმროში 640 პირი იმყოფება. უცხოეთიდან სამკურნალოდ გადმოყვანილი საქართველოს მოქალაქეების რაოდენობა ისევ 41–ია. ქვეყანაში ინფიცირების პირველი შემთხვევა 2020 წლის 26 თებერვალს დაფიქსირდა, ინფექციით ამ დრომდე 25 პაციენტი გარდაიცვალა.

რაც შეეხება სამცხე–ჯავახეთს, ბოლო ერთ კვირაში კოვიდინფიცირების ოთხი ახალი შემთხვევა დაფიქსირდა.

[ნუკა სტეფნაძე]