როგორი ამინდია მოსალოდნელი დასვენების დღეებში სამცხე–ჯავახეთში

შაბათს, 19 სექტემბერს ახალციხეში, ადიგენში, ასპინძასა და ბორჯომში ჰაერის ტემპერატურა +24, +26 გრადუსამდე დაიკლებს, ხოლო ღამით მოსალოდნელია +10, +12 გრადუსი.

დღის განმავლობაში ხანმოკლე წვიმა და ელჭექია ნავარაუდევი მაღალ მთაში. ახალქალაქში, ნინოწმინდასა და ბაკურიანში ტემპერატურა +21, +23 გრადუსამდე შემცირდება, ღამით კი +6, +8 იქნება.

კვირას, 20 სექტემბერს, რეგიონის მასშტაბით გამოიდარებს, ჰაერის ტემპერატურა 2–4 გრადუსით მოიმატებს.

ახალციხეში, ადიგენში, ასპინძასა და ბორჯომში დღისით +26, +28 გრადუსი დაფიქსირდება, ხოლო ღამით +10, +12 გრადუსი შენარჩუნდება.

საღამოს საათებში ხანმოკლე წვიმაა მოსალოდნელი მაღალ მთაშიც. ახალქალაქში, ნინოწმინდასა და ბაკურიანში, დღის განმავლობაში ჰაერის ტემპერატურა +23, +25 გრადუსს მიაღწევს, ღამით კი +4, +6 გრადუსამდე დაიკლებს.

21 სექტემბრიდან მთელს რეგიონში უნალექო და მზიანი ამინდი შენარჩუნდება.

[ნუკა სტეფნაძე]