დღეს, ორ სექტემბერს პარლამენტმა „საარჩევნო კოდექსში” შესატან საკანონმდებლო პაკეტს პირველი მოსმენით მხარი დაუჭირა. კანონპროექტის მიხედვით, ამომრჩევლის იძულების, დაშინებისა და ხმის მიცემის ფარულობის აკრძალვასთან დაკავშირებული დარღვევები სისხლის სამართლებრივ პასუხისმგებლობას გამოიწვევს.
ფოფხაძის განცხადებით, მხოლოდ კანონის გამკაცრება ამომრჩეველზე ზეწოლას და მუქარის ფაქტებს არ შეამცირებს, ამისთვის უფრო ქმედითი ნაბიჯების გადადგმაა საჭირო.
„ჩვენ გვახსოვს 2012 წლის ოქტომბერი, ღამე არ გადიოდა, რომ ჩვენი აქტივისტი არ ყოფილიყო საავადმყოფოში. ყველა ღამეს იყენებდა სააკაშვილის შტაბი ბორჯომის რაიონში რომ ეძალადა ჩვენს მომხრეებზე, არცერთი ფაქტი შემდგომ არ გამოძიებულა და არავინ არ დასჯილა, თუ ჩვენ არავის ვსჯით, რატომ ვამტკიცებთ ამ კანონებს?!“, – აცხადებს ფოფხაძე.
მისი თქმით, მსგავსი ფაქტები მოხდა, 2014–16 წლებშიც „ქართული ოცნების“ მმართველობის პერიოდშიც, თუმცა არც ამ დროს დასჯილა ვინმე.
“მინდა გაგახსენოთ 2014 წელს, ადგილობრივი თვითმმართველობის არჩევნებზე გაჩნდა ისეთი ფენომენი, როგორიც იყო საინიციატივო ჯგუფით 42-ე ნომრების დაინიცირება არჩევნებში, რომელთაც უშიშროება ეხმარებოდა არჩევნებში კოალიციის სხვა სუბიექტების წინააღმდეგ. 2016 წელს ძალიან ბევრი მაჟორიტარის წინააღმდეგ, რომელიც “ქართული ოცნების” ყველა წევრისთვის არ იყო მისაღები, უშიშროებამ იმუშავა. ძალიან კარგად ვიცით, რომ ისევ იქნება ძალოვნების ჩარევა საარჩევნო პროცესში. ამ კანონით ნუ შევაყრით ერთმანეთს და ამომრჩეველს თვალში ნაცარს, იმიტომ რომ წინასაარჩევნოდ ასეთი ქცევა, კიდევ უფრო აშორებს ერთმანეთს ადამიანებს, საზოგადოებას ერთმანეთს აპირისპირებს და ქმნის იმის ილუზიას, თითქოს ვიღაცას მართლა უნდა სამართლიანი არჩევნების ჩატარება.
თუ გინდათ სამართლიანი არჩევნების ჩატარება, მაშინ უნდა გველაპარაკა მექანიზმებზე. სხვა შემთხვევაში საუბარი იმაზე, თუ როგორ უნდა დავიცვათ ჩვენ ამომრჩეველი ზეწოლისაგან კანონის გამკაცრებით, ჩემთვის გაუგებარია. თუ არავინ არ დასჯილა, თუ არავისთვის პასუხი არ მოუთხოვიათ, რა ფორმით გინდათ, მარტო სასჯელის გამკაცრებით შეაფერხოთ ზეწოლა და ძალადობა“, – განაცხადა გედევან ფოფხაძემ.
„ქართული ოცნების“ ყოფილმა დეპუტატმა მოუწოდა მმართველ გუნდს, რომ დასაჯონ ის პირები, რომლებიც წინასაარჩევნოდ მასწავლებლებზე, ბაღისა და ადმინისტრაციის თანამშრომლებზე ზეწოლას ახდენენ.
„თუ მაინც და მაინც ჩვენი, ოპოზიციის დასჯა გინდათ და თუ გგონიათ, რომ ჩვენ ვაპირებთ ვინმეს ზეწოლას ეს არის აბსურდი. ეს კანონი რეალურად არაფერს არ ცვლის, თუ ეს უცხოელი პარტნიორებისთვის კეთდება მაშინ უფრო არსებითი მოვიფიქროთ. ის ძალოვნები, რომლებიც ამას ჩადიან დავსაჯოთ და დავანახოთ ყველას რომ ასეთი რამ არ უნდა ხდებოდეს. ჯერ ხომ ამის პრეცენდენტი არ შექმნილა. მე ვერ დავიჯერებ, რომ თქვენ, პარლამენტის წევრებმა არ იცით, რომ ადმინისტრაციული რესურსის გამოყენება ხდება და უშიშროება არის საარჩევნო პროცესში ჩარეული, იმიტომ რომ ერთად ვიყავით და ეს პროცესი ერთად გამოვიარეთ. უშიშროების თანამშრომლები ერევიან საარჩევნო პროცესში და სოსო გოგაშვილი [სუს-ის უფროსის ყოფილი მოადგილე] პარტიების საქმიანობაში იყო საუბარი. კონკრეტულ ფაქტებს გეტყვით, მაგრამ არა ტრიბუნიდან. მოგიწოდებთ, თუ გინდთ საარჩევნო პროცესი იყოს დემოკრატიული ჩვენ შეგვიძლია ერთმანეთთან ისე ვისაუბროთ, რომ ეს ვუზრუნველყოთ. თუ ამ კანონს მიიღებთ მინუსს ჩაიწერს ქართულ ოცნება“, – განაცხადა გედევან ფოფხაძემ.
კანონპროექტი უმრავლესობის წევრების რატი იონათამიშვილისა და გურამ მაჭარაშვილის ავტორობით მომზადდა. რის მიხედვითაც აკრძალულია ამომრჩევლის იძულება, დაშინება და ხმის მიცემის ფარულობის დარღვევა. აღნიშნული ქმედება იწვევს დამრღვევის სისხლის სამართლებრივ პასუხისმგებლობას.
გედევან ფოფხაძემ "ქართული ოცნება" 2019 წლის თებერვალში
დატოვა. იგი 2020 წლის ოქტომბრის საპარლამენტო არჩევნებში დიდუბე-ჩუღურეთის ოლქში „ჩვენი საქართველო - სოლიდარობის ალიანსის“ სახელით
იბრძოლებს.
[sknews.ge]