"მეტი ფერები ჩემს ქალაქს" - ფლეშმობი ახალციხეში

ღონისძიება პროექტის "კავკასიური კულტურული ინიციატივათა ქსელის" ფარგლებში მოეწყო. პროექტს "ევროკავშირი" აფინანსებს.

კულტურული ღონისძიება ახალციხის მეხუთე საჯარო სკოლასთან დაიწყო, სადაც სამხატვრო სკოლის მოსწავლეებმა სკოლის კედლები მოხატეს. შემდეგ კი ახალგაზრდებმა ცენტრალურ პარკში გადაინაცვლეს და ფლეშმობი მოაწყეს. ღონისძიებაში მონაწილეობა ახალციხის ქორეოგრაფიულმა და ფოლკლორულმა ანსამბლებმა, სამხატვრო და სამუსიკო სკოლის მოსწავლეებმა და თოჯინების თეატრის მსახიობებმა მიიღეს.

"გვინდოდა, რომ ცოტა მეტი ფერები შემოგვეტანა ამ ქალაქში, განსაკუთრებით ხანგრძლივი ზამთრის განმავლობაში, როცა ყველაზე ნაკლები ფერებია“, - ამბობს „კავკასიის კულტურული ინიციატივათ ქსელის“ კოორდინატორი საქართველოში თეა გალდავა.

აღნიშნული ღონისძიება ახალციხის მუნიციპალიტეტის გამგეობის კულტურის სამსახურისა და "ახალციხის ახალგაზრდული ცენტრის" მხარდაჭერით ჩატარდა.

მსგავსი აქციების ჩატარება საქართველოს კიდევ რამდენიმე ქალაქში იგეგმება.

"ახალციხე პირველია, სადაც ეს ღონისძიება ჩატარდა, ამის შემდეგ იქნება ახალქალაქში, შემდეგ ჩატარდება თბილისში, მერე მარნეულსა და ბოლნისში, ბოლოს ბათუმში გვაქვს დაგეგმილი", - ამბობს თეა გალდავა.



[თამარ თოთაძე, ახალციხე]