მესტიაში შესვლასა და გასვლაზე შეზღუდვები დაწესდა

დაბა მესტიაში, უშგულსა და ლენჯერში ფუნქციონირების უფლება მხოლოდ აფთიაქებს, საბანკო დაწესებულებს, სასურსათო მაღაზიებსა და ღია ტიპის საკვებ დაწესებულებებს ექნება.

„თავშეყრის ადგილებზე მკაცრად გაკონტროლდება დისტანციის დაცვა, დახურულ სივრცეებში ნიღბების გამოყენება და ხელის ჰიგიენა. მესტიის მუნიციპალიტეტში ჩატარდება ინტენსიური ეპიდემიოლოგიური კვლევები და ტესტირება. შესვლა-გასვლას კი პოლიცია გააკონტროლებს", – განაცხადა დღევანდელ ბრიფინგზე სახელმწიფო უსაფრთხოების სამსახურის უფროსის მოადგილემ ალექსანდრე ხოჯევანიშვილმა

გარდა ამისა, კორონავირუსის ფართო გავრცელების თავიდან აცილების მიზნით, შესაბამისი უწყებები მესტიის მუნიციპალიტეტის ყველა დასახლებიდან ტურისტების საკარანტინო სივრცეში განთავსებას უზრუნველყოფენ.

"ყველა მოქალაქე, რომელიც მესტიის მუნიციპალიტეტს დატოვებს, გაივლის სავალდებულო კარანტინს, ადგილზე შექმნილია რეგიონალური შტაბი, რომელიც ადგილობრივი მოსახლეობის დახმარებას უზრუნველყოფს და უწყებების კოორდინებულ ქმედებებს“, - განაცხადა ხოჯევანიშვილმა.

უწყებათშორისი საკოორდინაციო საბჭო მოქალეებს მოუწოდებს, აქტიურად გამოიყენონ აპლიკაცია StopCov-ი, რათა თავი აარიდონ ინფიცირებულ პირთან შესაძლო კონტაქტს და იმ სივრცეში გადაადგილებას, სადაც ინფიცირების მაღალი რისკია.

აპლიკაცია StopCov.ge-ს აპლიკაციის გადმოწერა ანდროიდის და iOS – ის მომხმარებლებს შეუძლიათ.

საქართველოში კორონავირუსის 1250 შემთხვევაა გამოვლენილი, აქედან 1010 ადამიანი გამოჯანმრთელდა, 17 კი გარდაიცვალა. კარანტინის რეჟიმშია 6 930 პირი, ხოლო სტაციონარში მეთვალყურეობის ქვეშ - 263.

[sknews.ge]