პროტესტი სათხეში – რატომ გადაკეტეს გზა ადგილობრივებმა

ფოტო: რადიო "ნორი"

ექვს ივლისს სათხეში მცხოვრებლები ჯერ ნინოწმინდის მერს შეხვდნენ, შემდეგ კი პროტესტის ნიშნად გზა გადაკეტეს. აქციის მონაწილეები პოლიციის მოთხოვნის შემდეგ დაიშალნენ.

ნინოწმინდის მერის, ანივარდ მოსოიანის განცხადებით, სასმელი წყლის პრობლემა სოფლის მხოლოდ ერთ უბანში, დაახლოებით 40 ოჯახს აწუხებს.

„არარაციონალურად იყენებენ წყალს, ყანებს რწყავენ, ჩვენ კი გვეუბნებიან მოდით და გააკონტროლეთო. 13:00 საათზე იყვნენ მერიაში, შევხვდი ვესაუბრე ვუთხარი, რომ საჭიროა ახალი პროექტის მომზადება, მანამდე კი რაციონალურად უნდა გამოიყენონ წყალი. ვუთხარი თქვენი პრობლემის შესახებ განცხადებით მოგვმართეთ–მეთქი, არ მოიტანეს განცხადება და გადაწყვიტეს გზის ჩაკეტვით გამოეხატათ თავიანთი უკმაყოფილება“,– განაცხადა ანივარდ მოსოიანმა.

სოფელი სათხეს მერის წარმომადგენელი გალუსტ კალოიანმა „სამხრეთის კარიბჭესთან“ განაცხადა, რომ პრობლემის შესახებ ინფორმაცია არ აქვს.

რადიო "ნორის" ინფორმაციით, ცენტრალური გზა დაახლოებით ერთი საათის განმავლობაში იყო დაკეტილი.

[რიმა სარუხანიან, ნინოწმინდა]