ასპინძასა და ადიგენში ა ჰეპატიტი გავრცელდა

შემთხვევები ასპინძის მუნიციპალიტეტის სოფელ ხერთვისსა და ადიგენის მუნიციპალიტეტის სოფელ უდეში გამოვლინდა. ბოლო შემთხვევა, სამი დღის წინ, უდეში დაფიქსირდა. ადიგენის საზოგადოებრივი ჯანდაცვის ცენტრში განმარტავენ, რომ დაავადება სოფელში, ასპინძის მუნიციპალიტეტის სოფელ ხერთვისიდან გავრცელდა.

ა ჰეპატიტის ვირუსი პირველად უდის მეორე საჯარო სკოლის მოსწავლეს აღმოაჩნდა. ადიგენის საზოგადოებრივი ჯანდაცვის ცენტრის დირექტორის ელენე თათენაშვილის განმარტებით, მოსწავლე ხერთვისში, დასთან იყო სტუმრად და იქ დაინფიცირდა.

„დაავადება წამოსულია ეპიდ კავშირით ხერთვისიდან. ჩვენი მოსწავლის და გათხოვილია ხერთვისში, სტუმრად იყო და ამ დროს დაავადდა. პირველი შემთხვევა სექტემბერში გამოვლინდა, დანარჩენები ნოემბრის თვეში. ეს უფრო მეზობლური კერაა. სოფლის სხვა უბანში არ დაფიქსირებულა“, - ამბობს ელენე თათენაშვილი და ამატებს, რომ სკოლაში უკვე ჩატარებულია დეზინფექცია და მოსწავლეებს საინფორმაციო ბუკლეტებიც დაურიგდათ.

მისივე თქმით, ყველა დაინფიცირებულმა ახალციხის სამედიცინო ცენტრში მკურნალობის კურსი გაიარა.

ასპინძის მუნიციპალიტეტის სოფელ ხერთვისში პირელი შემთხვევა აგვისტოს ბოლოს დაფიქსირდა, ა ჰეპატიტის ვირუსი მასობრივად კი 8 ოქტომბრიდან გავრცელდა.

ასპინძის საზოგადოებრივი ჯანდაცვის ცენტრის ხელმძღვანელის მზია პაპაშვილის განმარტებით, დაავადების გამომწვევი მიზეზები ამ დრომდე უცნობია: „ცალსახად იმის თქმა, რამ გამოიწვია დაავადება, ძნელია. მუშაობენ სპეციალისტები, ჩვენც მათთან ერთად და უახლოეს მომავალში ვიტყვით რითი შიძლება იყოს გამოწვეული. ვირუსით საერთო ჯამში 27 ადამიანი დაავადდა. ამ დროისთვის სამედიცინო დაწესებულებაში სამი წლის ბავშვი მკურნალობს“.

ა ჰეპატიტი, იგივე ბოტკინი, ენტეროვირუსული დაავადებაა, რომელიც აზიანებს ძირითადად ღვიძლს და იწვევს მის ანთებას. ინფექციის გავრცელების წყაროა ავადმყოფი ადამიანი. ჯანმრთელი ადამიანის ორგანიზმში ვირუსი შეიძლება მოხვდეს პირის ღრუდან ჭუჭყიანი ხელების, ნერწყვის, დაბინძურებული წყლისა და საკვების, სხვადასხვა საგნების, ნახმარი შპრიცებისა და ნემსების საშუალებით. ვირუსი შეიძლება გადაიტანონ ბუზებმა.

[Sknews.ge]