სომხეთში ინფიცირებულთა რიცხვმა 10 ათასს გადააჭარბა, გარდაცვლილია 158 ადამიანი

სომხეთის ჯანდაცვის სამინისტროს ინფორმაციით, ქვეყანაში 10 009 ადამიანი დაინფიცირდა, აქედან გამოჯანმრთელდა 3 427 პაციენტი, გარდაიცვალა 158.

„ქვეყანაში შეიძლება 18–20 ათასი ადამიანი იყოს დაინფიცირებული ასიმპტომურად, ისე როგორც ჩემი შემთხვევა იყო“, – განაცხადა მთავრობის სხდომის დასრულების შემდეგ გამართულ ბრიფინგზე ქვეყნის პრემიერ–მინისტრმა ნიკოლ ფაშინიანმა.

სომხეთის მთავრობის მეთაურს და მის ოჯახს კორონავირუსი გუშინ პირველ ივნისს დაუდასტურდათ.

ბოლო 24 საათში გარდაცვლილი 19 პაციენტიდან, ყველაზე ახალგაზრდა 50 წლის ქალია, ასაკოვანი კი 82 წლის კაცი.

ამჟამად სომხეთში კორონავირუსზე 6 368 ადამიანი მკურნალობს. ჩატარებული ტესტების საერთო რაოდენობაა 59 917.

სომხეთში კორონავირუსის პირველი შემთხვევა 28 თებერვალს დაფიქსირდა. ინფიცირებული სომხეთის 29 წლის მოქალაქეა, იგი ცოლთან ერთად ერევანში თეირანიდან დაბრუნდა.

[რიმა სარუხანიან]