აპრილში კომუნალური გადასახადების დაფინანსებაზე უარი 4 600-ზე მეტმა მოქალაქემ თქვა

„აპრილში უარი კომუნალურ სუბსიდიაზე 4 600-ზე მეტმა მოქალაქემ თქვა, მათ გადაწყვიტეს, რომ თვითონ გადაიხადონ კომუნალური გადასახადები და ამით ხელი შეუწყონ საბიუჯეტო სახსრების დაზოგვას. ჯამში მარტსა და აპრილში ერთად 9 200-ზე მეტმა მოქალაქემ თქვა უარი“,-განაცხადა ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარემ, დავით ნარმანიამ.

მისი თქმით, მარტის თვე უკვე შეჯამებულია და ჯამში 55 მილიონ ლარზე მეტია სამივე სახის კომუნალური მომსახურების დაფინანსებაზე სახელმწიფოს მხრიდან გაღებული.

სემეკის ინფორმაციით, მათ, ვისაც სურს სოლიდარობის ნიშნად არ ისარგებლოს ხელისუფლების მიერ დაწესებული კომუნალური შეღავათებით, მაისის სუბსიდიაზე უარის დაფიქსირება კომისიის ვებგვერდზე (www.gnerc.org/ge/covid-19) შეუძლიათ.

საქართველოს მთავრობის დადგენილების შესაბამისად, კომუნალური შეღავათები ეხება იმ ფიზიკურ პირებს, რომელთა კომუნალური მოხმარება თვის განმავლობაში (მარტი, აპრილი,მაისი) ელექტროენერგიის შემთხვევაში არ აღემატება 200 კვტ.სთ-ს, ხოლო ბუნებრივი გაზის შემთხვევაში - 200 კუბურ მეტრს.

გარდა ამისა, კომუნალური შეღავათების ფარგლებში წყალმომარაგებისა და დასუფთავების გადასახადი დაეფარება ყველა იმ აბონენტს, რომლებიც თვის განმავლობაში (მარტი, აპრილი, მაისი) მოიხმარენ 200 კვტ.სთ-ის ჩათვლით ელექტროენერგიას და სარგებლობენ კომუნალური შეღავათებით.

წყალმომარაგებისა და დასუფთავების გადასახადი არ დაიფარება იმ მოქალაქეების შემთხვევაში, რომელთაც შეეხოთ კომუნალური სუბსიდია, თუმცა სოლიდარობის ნიშნად უარს ამბობენ შეღავათებით სარგებლობაზე.



[sknews.ge]