‘ფერმერები 1 ჰა მიწის ნაკვეთზე 200 ლარს მიიღებენ’ - პრემიერი

„თითოეული ფერმერი, რომელსაც აქვს დარეგისტრირებული მიწა, მიიღებს 1 ჰექტარზე დახმარებას სახელმწიფოსგან 200 ლარის სუბსიდირებით. ეს ნიშნავს იმას, რომ საშუალო დონისა და მსხვილი საფერმერო მეურნეობები, რომლებსაც გააჩნიათ 10 ჰექტარი მიწა და ამუშავებენ, მიიღებენ სახელმწიფოსგან დახმარებას 2 000 ლარის ოდენობით. ეს პროპორციულად გადანაწილდება იმ ფერმერებზეც, რომლებსაც აქვთ შედარებით ნაკლები მოცულობის ფართობის მიწები“, - განაცხადა ანტიკრიზისული გეგმის წარდგენისას პრემიერ-მინისტრმა.

მისივე თქმით, ფერმერებს შეეძლებათ ისარგებლონ იაფი აგროსაწვავითაც: „ყველა ფერმერი 1 ჰექტარზე მიიღებს 150 ლიტრ დიზელის საწვავს, რომელიც გარანტირებულად იქნება საბაზრო ფასზე 1 ლარით იაფი. სასოფლო-სამეურნეო საქმიანობისთვის საწვავის ფასი არის კრიტიკულად მნიშვნელოვანი და ჩვენ ახლა ვმუშაობთ უკვე ამ პრობლემის გადასაწყვეტად არა მხოლოდ კრიზისში, წელს, არამედ მომავალი წლებისთვისაც. აგრო დიზელის ფასი მნიშვნელოვნად იაფი იქნება, ვიდრე დიზელის ფასი ბაზარზე“.

გეგმის მიხედვით, 20 წლის განმავლობაში საქართველოში 42 000 ფერმერი გათავისუფლდება სარწყავი წყლის გადასახადიდან.

„თითოეული ფერმერი რომელსაც დასჭირდება ტექნიკის შეძენა სასათბურე მეურნეობის მოწყობა ან სარწყავი სისტემის მოწყობა მას სახელმწიფო პირდაპირი ფინანსური სახით დაეხმარება ამ სამუშაოების 50%-ით. ეს იქნება გრანტი“, - განაცხადა გიორგი გახარიამ.

მისივე თქმით, სოფლის მეურნეობის ანტიკრიზისული გეგმა ძალაში 20 მაისიდან შევა. მთლიანობაში სახელმწიფო დაეხმარება დაახლოებით 200 000 ფერმერს. საერთო ჯამში ამისათვის 300 მილიონი ლარი დაიხარჯება.

[თაკო ფეიქრიშვილი]