‘სურსათს ვერ ვყიდულობთ’ – რა პრობლემები შექმნა სოფლებში მანქანით გადაადგილების შეზღუდვამ

ფოტო: Emc

24 აპრილიდან მუსლიმებისთვის რამაზანი, ანუ მარხვა იწყება, რომელიც ერთი თვის განმავლობაში გაგრძელდება. ჭელას მეჩეთის წინამძღვარი, ჯამბულ ამბულაძე ამბობს, რომ მარხვისთვის ადგილობრივებს სურსათის მომარაგება სჭირდებათ, თუმცა მანქანით გადაადგილების შესაძლებლობა არ აქვთ და უახლოესი სავაჭრო ობიექტი დაბა ადიგენში მდებარეობს, რომელიც 7-8 კილომეტრით არის დაშორებული მათი სოფლიდან:

„ჩვენთან, ჭელა, საირმე, ჭეჭლაში მაღაზია არ არის. ადიგენიდან ფეხით ვერ ამოვიტანთ სურსათს. ახლა მოდის მარხვა, რომელიც გულისხმობს, გარიჟრაჟიდან საღამომდე საჭმლისგან თავის შეკავებას, თუმცა საღამოდან გამთენიამდე შესაძლებელია მიირთვა. ჩვენ არ ვერიდებით ცხიმიანს და სხვა ტიპის საკვებს, უბრალოდ, ვცდილობთ იმ პერიოდში, როცა ჭამა დასაშვებია უფრო მეტად კალორიული საჭმელი მივიღოთ. განსაკუთრებულად ვყიდულობთ პროდუქტს, რომ მივიღოთ ყველანაირი ვიტამინი“, - ამბობს სასულიერო პირი.

იმამი მიიჩნევს, რომ შეზღუდვის გაუქმება მხოლოდ ერთი კონფესიის სასულიერო პირებისთვის არასამართლიანია: „ჩვენს სასულიერო პირებზე არ ვრცელდება შეღავათები, რომ მაგალითად მე წავიდე და რამდენიმე ადამიანს მოვუტანო სურსათი. მშივრები არ დავიხოცებით, მაგრამ დისკომფორტს ნამდვილად გვიქმნის და თუ იმ ფონს ავიღებთ, რომ ვიღაცეებს აქვთ გადაადგილების საშუალება და არ ზღუდავენ, ვიღაცეებს კი არ აქვთ ეს საშუალება, ეს უფრო მოქმედებს და უსამართლობის გრძნობას იწვევს“.

ადიგენში მცხოვრებლების 20%-ი აღმსარებლობით მუსლიმია.



ქვეყანაში მსუბუქი მანქანებით გადაადგილება 17–დან 27 აპრილამდე აიკრძალა. გარემოს დაცვისა და სოფლის მეურნეობის მინისტრი ლევან დავითაშვილი ამბობს, რომ შეზღუდვებით გამოწვეული დისკომფორტის შესახებ სამინისტრო ინფორმირებულია, თუმცა ეს აუცილებელი წინაპირობა იყო ეპიდემიოლოგიური მდგომარეობის შენარჩუნებისთვის.

„არაერთხელ განგვიცხადებია, თითოეული ეს შეზღუდვა გულისხმობს დამატებით დისკომფორტს ჩვენი მოსახლეობისთვის. ეს უკავშირდება უბრალოდ საყოფაცხოვრებო, თუ სამეურნეო საქმიანობას ამა თუ იმ სუბიექტების. ასევე, სატრანსპორტო საშუალებების გადაადგილების შეზღუდვამ და შეზღუდვის გაგრძელებამ, ვიცით, რომ ჩვენს მოსახლეობას დამატებითი დისკომფორტი შეუქმნა“, - განაცხადა ბრიფინგზე მინისტრმა.

მისივე თქმით, მოქალაქეებმა გადაადგილებასთან დაკავშირებული კითხვებით შეუძლიათ ადგილობრივ მუნიციპალიტეტებს მიმართონ.

„მუნიციპალიტეტების დონეზე, ყოველდღიურად შეუძლიათ, ჰქონდეთ კომუნიკაცია და მუნიციპალიტეტები მისცემენ საშვებს, დამატებით უფლებას მცირე მაღაზიების ოპერირების შემთხვევაში, ასევე დამატებით ინფორმაციას კითხვებზე, რომელიც შეიძლება, ჰქონდეთ გადაადგილებასთან დაკავშირებით“.

[თაკო ფეიქრიშვილი, ადიგენი]