‘ ერთ დღეში 260 000-ზე მეტი ზარი შევიდა, რამაც გამოიწვია შეფერხება’ - მთავრობა 144-ზე

144, რომელიც მთავრობის ერთიან საინფორმაციო ცხელ ხაზს წარმოადგენს და მისი საშუალებით მოქალეებმა საგანგებო მდგომარეობით დაწესებული შეზღუდვებისა და დაშვებების შესახებ ინფორმაცია უნდა მიიღონ, შეზღუდვებით მუშაობს. სოციალურ ქსელებში მოქალაქეები ჩივიან, რომ ნომერზე დარეკვისას ავტომატური მოპასუხე ირთვება და აუწყებს, რომ „ყველა ოპერატორი დაკავებულია“. მათი ნაწილი ხაზს უსვამს, იმასაც, რომ ნომერს არ ააქვს მოლოდინის რეჟიმი და ზარი ავტომატურად ითიშება.

მსგავსი პრობლემა ჰქონდა დღეს, 22 აპრილს „სამხრეთის კარიბჭესაც“. რამდენიმე მცდელობის მიუხედავად, რედაქცია საინფორმაციო ცენტრს ვერ დაუკავშირდა.

გარდა 144-ისა, მოქალაქეები ამბობენ, რომ შეფერხებით მუშაობს 112-იც, რომელიც გადაუდებელი შემთხვევებისთვის ფუნქციონირებს.

პრობლემების მიზეზად მთავრობაში გადატვირთულ ხაზებს ასახელებენ. პრემიერ-მინისტრის პრესსპიკერის, ირაკლი ჩიქოვანის განმარტებით, 22 აპრილს, დღის განმავლობაში 260 000 ზარზე მეტი შევიდა, რის გამოც ხაზი შეფერხებით მუშაობდა.

„ჩვენ კარგად გვესმის, რომ რეგულაციების ამოქმედების პირველ ორ დღეს განსაკუთრებულად მაღალია აქტივობა და ჩვენ მზად ვართ რომ გავუმკლავდეთ ამას. ყველას მინდა ბოდიში მოვუხადო რაიმე ფორმის შეფერხებისთვის, მაგრამ ეს ხაზი აგრძელებს მუშაობას და ჩვენ მოქალაქეებს მივაწვდით ინფორმაციას, იმ შეზღუდვებთან დაკავშირებით, რომლებიც არსებობს და იმ გამონაკლისებზე, რომლის მიხედვითაც მათ შეუძლიათ ისარგებლონ“, - განმარტავს ჩიქოვანი და ამატებს, რომ იგივე მიზეზით შეფერხდა მუშობა 112-ზეც: „მინდა ხაზი გავუსვა იმას, რომ როდესაც ჩვენი თანამოქალაქეები 144-ზე ვერ იღებენ ინფორმაციას, საგანგებო მდგომარეობასთან დაკავშირებით, ისინი მიმართავენ 112-ს.

თქვენ იცით, რომ ქვეყანაში 112 ფუნქციონირებს განსაკუთრებული შემთხვევებისთვის ეს არის ის ცხელი ხაზი, რომელიც აუცილებელია ჩვენი თანამოქალქეებისათვის, როცა მათ სურთ დაკავშირება პოლიციასთან ან სურთ მიიღონ სასწრაფო გადაუდებელი დახმარება“.

[თაკო ფეიქრიშვილი, ახალციხე]