პირველი არხის ეთერში 'ტელესკოლა' დაიწყო

„ტელესკოლა“ განათლების სამინისტროსა და საქართველოს პირველი არხის ერთობლივი პროექტია.

ტელეგაკვეთილებს სხვადასხვა საგნის გამოცდილი პედაგოგები ატარებენ.

გაკვეთილები მოიცავს როგორც ქართულ, ასევე არაქართულენოვან სექტორს (სომხური, აზერბაიჯანული). ტელეგაკვეთილები უზრუნველყოფილი იქნება სურდოთარგმანით.

ტელეკომპანიის განცხადებით, გარდა ამისა, არხის საეთერო ბადეში განთავსდება დოკუმენტური ფილმების ციკლი „ქართლის ცხოვრება მარიამ ლორთქიფანიძესთან ერთად“ (16 სერია); „არტესა“ და „ბიბისის“ დოკუმენტურ-შემეცნებითი ფილმები, რომლებსაც პედაგოგები სასწავლო პროგრამის ნაწილად გამოიყენებენ. გაკვეთილებს შორის იქნება მცირე ქრონომეტრაჟის სპორტის გაკვეთილები.

პროექტი „ტელესკოლა“ ახალი საგანმანათლებლო ტელეარხის, პირველი არხი|განათლების ეთერში გადის. ახალი საგანმანათლებლო არხისთვის სპეციალურად შეიქმნა ახალი ლოგო, შეფუთვა და სამაუწყებლო ბადე.

კორონავირუსის პრევენციის მიზნით საქართველოს სკოლებში სწავლა ორი მარტიდან შეწყდა. დაკეტილია ყველა საგანმანათლებლო დაწესებულება.

ქვეყანაში კორონავირუსის პირველი შემთხვევა 2020 წლის 26 თებერვალს დაფიქსირდა. 30 მარტის დილის მონაცემები ასეთია:

დადასტურებული შემთხვევა - 91
მათ შორის გამოჯანმრთელებული - 18
კარანტინის რეჟიმში - 4876
სტაციონარში მეთვალყურეობის ქვეშ - 264

[sknews.ge]