უცხოეთში მყოფი საქართველოს მოქალაქეების ჩამოსაყვანად ფრენები 26 მარტიდან იწყება

როგორც, ზალკალიანმა განაცხადა, მოქალაქეებს ბილეთების შეძენასთან დაკავშირებით, ინფორმაციას რეისების შესრულებამდე რამდენიმე დღით ადრე მიაწოდებენ.

„უკვე განხორციელდა ორი ფრენა 23 მარტს, თბილისი–ბერლინი–ბათუმის მიმართულებით და 24 მარტს, ათენი–თბილისი–ათენის მიმართულებით, რომელიც შეასრულა ეგეოსის ავია ხაზებმა და ამ ორი რეისით საქართველოში დაბრუნდა საქართველოს 300 მოქალაქე. რაც შეეხება შემდეგ განრიგს ის ასეთი გახლავთ: 26 მარტს შესრულდება რეისი თბილის–ვენა–თბილისი, ხოლო 31 მარტს თბილისი–ამსტერდამი– თბილისი, ასევე 3 აპრილს–თბილისი–ვარშავა–თბილისის მიმართულებით, 7 აპრილს კი თბილისი–ათენი–თბილისის და 10 აპრილს ლარნაკა–თბილისის მიმართულებით, მგზავრთა ნაკადის ორგანიზებული მართვის და მოქალაქეების საჭიროებაზე ეფექტიანი რეაგირების მიზნით, ზემოთ მოცემული განრიგით განსაზღვრულ თითოეულ ფრენაზე ბილეთები ხელმისაწვდომი იქნება ეტაპობრივად და ამის შესახებ ინფორმაციას რეისების შესრულებამდე გაიგებთ რამდენიმე დღით ადრე,“ – განაცხადა დავით ზალკალიანმა.

ზალკალიანმა ასევე აღნიშნა, რომ ფრენები რომლებიც ვენის და ამსტერდამის მიმართულებით შექმნილი ვითარების გამო გაუქმდა 26 და 31 მარტს განხორციელდება.

„რაც შეეხება უახლოეს ორ ფრენას ვენის და ამსტერდამის მიმართულებით, რომელიც შესაბამისად უნდა შესრულდეს 26 მარტს 31 მარტს , როგორც უკვე ცნობილია კომპანია აირზენას თბილისი–ვენა–თბილისის მიმართულებით 22 მარტს ჰქონდა დაგეგმილი რეგულარული რეისი, რომელიც კორონავირუისის გავრცელებასთან დაკავშირებით, ქვეყანაში შემოღებული რეგულაციების გამო გაუქმდა. ამ ეტაპზე უაღრესად მნიშვნელოვანი და აუცილებელიცაა, რომ ეს ადამიანები, რომლებიც დროებით არიან განთავსებული სხვადასხვა ადგილას, მხედველობაში მაქვს ვენა და ამსტერდამი დავაბრუნოთ სამშობლოში, სამწუხაროდ მათი რაოდენობა არ არის მცირე და ორივე საჰერო ხომალდი ფაქტობრივად სრულად ივსება,“ –თქვა ზალკალიანმა.

აღნიშნულ რეისებზე მსოფლიო ჯანდაცვის ორგანიზაციის მიერ დაწესებული პროტოკოლით, მგზავრების განლაგება მოხდება ჭადრაკისებური პრინციპით.

23 და 24 მარტს განხორციელბული ფრენებით საქართველოში 300 მოქალაქე დაბრუნდა.

საქართველოს საგარეო საქმეთა მინისტრის თქმით მკაცრად გაკონტროლდება ბილეთების ფასი, რომლიც 199 ევროს არ აღემატება.

საქართველოში 25 მარტის 12:30 საათის მონაცემებით, კორონავირუსის 73 შემთხვევაა დადასტურებული. 10 პაციენტი უკვე გამოჯანმრთელებულად მიიჩნევა. კარანტინის რეჟიმში 4 055 პაციენტი იმყოფება, ხოლო სტაციონალური მეთვალყურეობის ქვეშ 252. ქვეყანაში მოქმედებს საგანგებო მდგომარეობა, მარნეულისა და ბოლნისის მუნიციპალიტეტები ჩაკეტილია და გამოცხადებულია კარანტინის ზონებად.

[ნუკა სტეფნაძე, ახალციხე]