‘მაქსიმალურად შევეცადოთ სახლში დარჩენას’ - ბორჯომის ეპისკოპოსი ლაზარე

ეპისკოპოსი მიმართვას ესაია წინასწარმეტყველის ამ სიტყვებით იწყებს: „მოდით, ჩემო ხალხო, შედით თქვენს ოთახებში და გამოიკეტეთ კარი, მცირე ხნით შეაფარეთ თავი, ვიდრე რისხვა გადაივლიდეს“( ესაია 26 – 20 )

ღვთისმსახური მორწმუნეებს მოუწოდებს, ქვეყანაში არსებული მძიმე პრიოდი ერთმანეთზე ზრუნვით გადალახონ.

„მინდა შეგახსენოთ და მოგიწოდოთ საქართველოს მთავრობის მიერ გამოცხადებული საგანგებო მდგომარეობის შესახებ (21.03.2020) და ზედმიწევნით შეასრულოთ ყველა ის რეგულაცია“.

გარდა ამისა, იგი მრევლს რამდენიმე რეკომენდაციით მიმართავს და აღნიშნავს, რომ ეპარქიის სასულიერო პირები მზად არიან მორწმუნეებთან, რომლებსაც ლიტურგიაზე დასწრება არ შეუძლიათ, სახლში მივიდნენ მსახურების შესასრულებლად.

„- ღვთისმსახურების დასწრების დროს დაცული იქნას რეკომენდირებული დისტანცია თქვენსა და სხვა ადამიანებს შორის.

- ვინც არიან რისკ-ჯგუფში შემავალი ადამიანები თქვენივე უსაფრთხოებისათვის, მოგიწოდებთ მაქსიმალურად შეზღუდოთ სხვა ადამიანებთან კონტაქტი, რათა არ შეუქმნათ საფრთხე როგორც საკუთარ თავს, ასევე სხვა ადამიანთა სიცოცხლეს.

- მაქსიმალურად შევეცადოთ სახლში დარჩენა და გავაძლიეროთ ლოცვები წმინდა სინოდის განჩინებისამებრ: „მამაო ჩვენო“, „ღვთისმშობელო ქალწულო“, „გიხაროდენ“ და მოწყალებისა კარი განგვიღე“. ასევე შეგიძლიათ ნებისმიერი ლოცვა.

- საჭიროებისამებრ ჩვენი ეპარქიის სასულიერო პირები მზად არიან, ვისაც სურვილი აქვს თავად ესტუმრონ სახლებში და შესაბამისი მსახურება ჩაუტარონ“, - ნათქვამია ეპისკოპოსის განცხადებაში.
ღვთისმსახური ლაზარე (სამადბეგიშვილი)ბორჯომისა და ბაკურიანის ეპარქიის მმართველად 2017 წლის იანვარში დაინიშნა. იგი მანამდე ავსტრია-გერმანიის ეპარქიაში მოღვაწეობდა.