ვინ გააკონტროლებს სამცხე–ჯავახეთში ქორწილებისა და ქელეხების აკრძალვის შესრულებას

„როგორც იცით ყველა სარიტუალო დარბაზი, რესტორანი დაკეტილია, სადაც შესაძლებელია ქორწილების და ქელეხების გადახდა, რაც მკაცრად კონტროლდება. მუნიციპალიტეტის თანამშრომლების, მათშორის მერის წარმომადგენლების და პოლიციის საშუალებით კონტროლდება, რომ სახლის პირობებშიც არ მოხდეს 10 კაცზე მეტი პირის შეკრება, დარღვევის შემთხვევაში დაეკისრებათ შეესაბამისი სანქცია,“ – უთხრა „სამხრეთის კარიბჭეს“ სახელმწიფო რწმუნებულის აპარატის ხელმძღვანელმა, გიორგი მიქელაძემ.

მისი თქმით, ამ დროისთვის მსგავსი ტიპის დარღვევა რეგიონის მასშტაბით არ გამოვლენილა.

საქართველოში ახალი კორონავირუსის გავრცელების აღკვეთის მიზნით ქვეყნის მთელ ტერიტორიაზე გასატარებელი ღონისძიებები საქართველოს პრეზიდენტის 2020 წლის 21 მარტის N1 დეკრეტით დამტკიცდა.

„იკრძალება ისეთი სიციალური ღონისძიებები, რომლებიც დაკავშირებულია 10–ზე მეტი ფიზიკური პირის შეკრებასთან (მაგ: ქელეხები, ქორწილები და სხვა მსგავსი ღონისძიებებია),“– აღნიშნულია მთავრობის მიერ დადგენილ კანონპორექტში.

აიკრძალა ასევე კულტურული ასევე სპორტული ღონისძიებები.

23 მარტის მონაცემებით, საქართველოში, ახალი კორონავირუსი 54 ადამიანს დაუდგინდა, უკვე გამოჯანმრთელებული 8 პაციენტი, 3320 ადამიანი კარანტინშია მოთავსებული, 235 კი სტაციონარული მეთვალყურეობის ქვეშ იმყოფება.

კორონავირუსის გავრცელების საფრთხის გამო ქვეყანაში საგანგებო მდგომარეობა მოქმედებს. დღეს, 23 მარტს, კარანტინის ზონებად გამოცხადდა და ჩაიკეტა მარნეულისა და ბოლნისის მუნიციპალიტეტები.

[ნუკა სტეფნაძე, ახალციხე]