ახალი წესები ახალქალაქის თვითმმართველობაში

ახალი წესის თანახმად, ახალქალაქის საკრებულოსა და გამგეობის შენობაში შესვლისას, სასურველ ადრესატამდე მისასვლელად პიროვნებამ ოფიციალური ნებართვა უნდა მიიღოს. ნებართვას, ანუ, საშვს, რამდენიმე საფეხურის გავლა სჭირდება. თავდაპირველად უნდა დადგინდეს არის თუ არა ადგილზე და აქვს თუ არა მიღების საათები ან სურვილი სასურველ საჯარო პირს. ამის შემდეგ ივსება რეგისტრაციის წიგნი, სადაც ფიქსირდება ვიზიტორის ვიანობა, პირადობის მონაცემები, მისვლის საათი და ვისთან და რა საკითხებზე მიდის.

სამოქალაქო ტანისამოსში ჩაცმული ახალგაზრდები, რომლებიც წარმომადგენლობითი შენობების შესასვლელებში სხედან და იქ მიმსვლელებს არეგისტრირებენ, სამხედრო მოსამსახურეები არიან. ეს მათთვის არა ჩვეულებრივი სამუშაო, არამედ სამხედრო სამსახურია და ხელფასის ნაცვლად სიმბოლურ 16 ლარს იღებენ.

ახალქალაქის მუნიციპალიტეტის გამგებლის ნაირი ირიციანის თქმით, მომსვლელთა რეგისტრაცია მიმდინარეობს კანონის თანახმად, რომელსაც ადრე უბრალოდ არ იყენებდნენ. გამგებლის თქმით, რეგისტრაციის პროცესის დაწყების ინიციატივა თავად ეკუთვნის და ამიერიდან რეგისტრაცია ყოველთვის საჭირო იქნება.

გამგებლის მტკიცებით, “რეგისტრაციის დახმარებით, პირველ რიგში მოსახლეობის ნაკადი დარეგულირდება და პირები, რომლებსაც კონკრეტული საქმე არ აქვთ და შენობაში შესვლა უბრალოდ საპირფარეშოთი სარგებლობის ან იქ დროის გაყვანისთვის უნდათ, ამას ვეღარ მოახერხებენ”. მეორე მხრივ, კი ნათლად გამოჩნდება, ყველაზე ინტენსიურად რომელ სამსახურს მიმართავს ახალქალაქის მოსახლეობა.

[აღუნიკ აივაზიანი, ახალქალაქი]