ახალციხეში მოქმედ რელიგიურ სალოცავებს დეზინფექცია უტარდება

რელიგიური უმცირესობების სალოცავებში, ახალციხის საზოგადოებრივი ჯანდაცვის ცენტრის წარმომადგენლებმა დეზინფექცია დღეს, 13 მარტს ჩაატარეს. ისინი ვალისა და ახალციხის კათოლიკურ ტაძრებში, ებრაულ სინაგოგასა და სომხურ ეკლესიებში უკვე იმყოფებოდნენ.

„ახალციხის მუნიციპალიტეტიდან იყვნენ. ჩაატარეს დეზინფექცია და გვითხრეს რომ 24 საათის განმავლობაში არ შეიძლება შესვლა, ამიტომ ხვალინდელი ლოცვა არ ჩატარდება. 24 საათის შემდეგ სველი წესით უნდა დავასუფთაოთ ეკლესია. ხალხმა წინასწარ იცოდა რომ მოვიდოდნენ, მრევლს აქვს ინფორმაცია. ჩემი აზრით, მსგავსი დასუფთავება წელიწადში ერთხელ მაინც უნდა ხდებოდეს“, - ამბობს ვალის ღვთისმშობლის შობის სახელობის ტაძრის წინამძღვარი მიხეილ სურმავა.

სამუშაოები ჩატარდა ახალციხის სინაგოგაშიც: „იყვნენ მოსულები და ჩაატარეს დეზინფექცია“, - ამბობს ებრაელთა კავშირის თავმჯდომარე სიმონ ლევიშვილი.

დეზინფექციის სამუშაოებთან დაკავშირებით, უმცირესობების წარმომადგენლებმა ინფორმაცია რელიგიის სახელმწიფო სააგენტოს სამცხე-ჯავახეთის რეგიონული წარმომადგენლისგან მიიღეს.

„უკვე დასრულდა უმცირესობების სალოცავებისა და მუსლიმური სასწავლებლის დეზინფექცია. ახლა მართლმადიდებელ ეკლესიასთან უნდა იყოს შეთანხმება, იმის გამო, რომ დეზინფექციის შემდეგ, სასურველია 24 საათი არ შევიდნენ შენობაში. აქედან გამომდინარე, მეუფესთან არის შესათანხმებელი, როდის უნდა ჩატარდეს წირვა. კათოლიკეებთან და სომხურ ეკლესიასთან შევთანხმდით, რომ 24 საათი არ ჩატარდება“, - ამბობს სააგენტოს სამცხე-ჯაავხეთის რეგიონული წარმომადგენლი ელვბარდ ზაზაძე და ამატებს, რომ სამცხე-ჯავახეთის სხვა მუნიციპალიტეტებშიც რელიგიური კონფესიების სალოცავების დეზინფექცია ადგილობრივმა თვითმმართველობამ უნდა გააკეთოს.

ცნობისთვის, ახალციხის საზოგადოებრივი ჯანდაცვის ცენტრმა, ხელშეკრულებით აიყვანა ორი თანამშრომელი, რომლებიც მუნიციპალიტეტის მასშტაბით ყველა საჯარო შენობას დეზინფექციას ჩაუტარებენ.

[თაკო ფეიქრიშვილი, ახალციხე]