ირანის მოქალაქე, რომელმაც ბოქსირებული პალატის კარი გატეხა და გამოვიდა, აბასთუმანში გადაიყვანეს

ინფექციურ საავადმყოფოში ამბობენ რომ პაციენტს ვირუსი არ ჰქონდა, თუმცა ბოქსირებული განყოფილების დატოვების უფლება არ ჰქონდა.

„ემოციურად იყო დატვირთული. გატეხა კარადა, რომელსაც ამოაძრო პატარა ნაწილი, იმ ნაწილით გააღო კარი და გამოვიდა. მართალია, ის საზოგადოებისთვის საფრთხეს არ წარმოადგენდა, რადგან არის ჯანმრთელი, თუმცა, მისთვის კარანტინის გავლა სავალდებულოა. ეს ადამიანი საქართველოში 25 თებერვალს შემოვიდა ირანიდან აზერბაიჯანის გავლით. მას ჰქონდა მსუბუქი ხველა, გადმოიყვანეს ჩვენთან, ჩაუტარდა შესაბამისი გამოკვლევა და არ დაუდასტურდა კორონავირუსი. ამჟამად გადაყვანილია აბასთუმანში, კარანტინში“, - განუცხადა „რადიო თავისუფლებას“ ბოქსირებული განყოფილების უფროსმა, მარინე ენდელაძემ.

ახალგაზრდა მამაკაცმა ბოქსირებული განყოფილების თვითნებურად დატოვების შემდეგ, ჟურნალისტებს უთხრა, რომ ჯანმრთელი იყო, რისთვისაც მადლობას იხდიდა, რა დროსაც ინფექციური საავადმყოფოს ექიმებმა ბოქსირებულ განყოფილებაში ძალის გამოყენებით დააბრუნეს.

გუშინ საქართველოში კორონავირუსით ინფიცირების პირველი შემთხვევა დაფიქსირდა. კორონავირუსი აღმოაჩნდა საქართველოს მოქალაქეს, რომელიც ირინიდან აზერბაიჯანის გავლით საქართველოში შემოდიოდა. ინფიცირებული პაციენტი საზღვრიდან გადაიყავნეს ინფექციურ საავადმყოფოში.

ამ დროსთვის აბასთუმანის ფილტვის ცენტრში დაკვირვების ქვეშ 15 პაციენტი იმყოფება. ისინი კარანტინს 14 დღიანი იმუნიზაციის პერიოდის გასვლის შემდეგ დატოვებენ, იმ შემთხვევაში, თუ ვირუსი არ გამოუვლინდებათ.

[sknews.ge]