ახალქალაქში, ბურნაშეთისა და ბარალეთის სკოლებში ბიბლიოთეკები მოეწყო

ბურნაშეთის ერთ და ბარალეთის ორ - ქართულ და სომხურენოვან სკოლებში საგანმანათლებლო მოძრაობა „ეკვილიბრიუმის“ ფარგლებში, ბიბლიოთეკები მოეწყო. აქ ქართული და ინგლისურენოვანი ლიტერატურა საგანმანათლებლო რესურსცენტრთან შეთანხმებით შეიტანეს.

პარალელურად, საქართველოს პარლამენტის ეროვნული ბიბლიოთეკის დირექტორმა, გიორგი კეკელიძემ წიგნიერებასა და განათლებაზე საჯარო ლექცია გამართა.

სამცხე-ჯავახეთის სოფლებში „ეკვილიბრიუმის“ ფარგლებში ბიბლიოთეკების მოწყობის ინიციატივა საქართველოს საზოგადოებრივ საქმეთა ინსტიტუტს ეკუთვნის, რომელიც ახორციელებს ევროკავშირის მიერ დაფინანსებულ პროექტს - “ახალქალაქის მუნიციპალიტეტის განვითარება“.

„ახალქალაქის მუნიციპალიტეტში შექმნა „ადგილობრივი განვითარების ჯგუფი“ (LAG), რომელმაც ჩამოაყალიბა სასწავლო ცენტრი. იგი ახალგაზრდებს სთავაზობს ინტენსიური ინგლისური, ქართული ენის შემსწავლელ კურსებს, ხატვის კურსებს და ა.შ. გადავწყვიტეთ, განათლების კომპონენტის გაძლიერების მიზნით, ამ პროექტში ჩაგვერთო საქართველოს პარლამენტის ეროვნული ბიბლიოთეკა, რომელიც ჩვენგან დამოუკიდებლად, „ეკვილიბრიუმის“ფარგლებში, სხვადსხვა რეგიონებში ახორციელებს პროექტს, თუმცა იგი სამცხე-ჯავახეთს არ მოიცავდა“, - ამბობს საქართველოს საზოგადოებრივ საქმეთა ინსტიტუტის სოფლის განვითარების და პროფესიული სწავლების დეპარტამენტის უფროსი, ნანა ქაშაკაშვილი.

პროექტის ფარგლებში, ბიბლიოთეკა ახალქალაქის 12 სკოლაში მოეწყო, მთლიანობაში ორგანიზატორები 62 სკოლაში შესვლას გეგმავენ.

აქტივობა ყოველ თვეში ერთხელ, შაბათ-კვირას იმართება: „თვეში ერთხელ მაინც, შაბათ-კვირას LAG -ის სასწავლო ცენტრში იმართება გიორგი კეკელიძის საჯარო ლექციები და ჩვენი კურსდამთავრებულები იღებენ მონაწილეობას. მეორე დღეს კვირას, ჩვენ მივდივართ სოფლებში, სადაც გადასცემენ წიგნებს და მათი ბიბილიოთეკები მდიდრდება წიგნებით“, - განმარტავს ქაშაკაშვილი.

[თაკო ფეიქრიშვილი, ახალქალაქი]