რა შემთხვევაში დატოვებენ სკოლას პრაქტიკოსი მასწავლებლები

მასწავლებლობის კომპეტენციის დადასტურების შედეგები, რომლის მიხედვითაც პედაგოგებმა სტატუსი აიმაღლეს ან ვერ აიმაღლეს, უკვე გამოქვეყნებულია.

იმ პრაქტიკოს მასწავლებლებს, რომლებმაც ვერ მოიპოვეს უფროსი მასწავლებლის სტატუსი, დირექტორი გაუფორმებს ვადიან ხელშეკრულებას, მათი პოზიცია კი ვაკანტურად გამოცხადდება.

ასეთი მასწავლებლები სკოლაში 2019-2020 წლის ბოლომდე დარჩებიან: „ჯერ-ჯერობით მათთან ხელშეკრულება არ წყდება. ამ სასწავლო წლის ბოლომდე დარჩებიან სკოლაში“ - ამის შესახებ „სამხრეთის კარიბჭეს“ მასწავლებელთა პროფესიული განვითარების ცენტრში განუცხადეს.

პრაქტიკოს მასწავლებლებს გამოცაზე გასვლა 2020 წლის ზაფხულშიც შეძლებათ. რამდენი ქულა იქნება გამსვლელი, ამ ეტაპზე უცნობია.

ახალი, 2020–21 სასწავლო წლის დაწყებამდე სკოლა შექმნის საკონკურსო კომისიას და განიხილავს იმ კანდიდატურებს, რომლებიც აკმაყოფილებენ ზოგადი განათლების შესახებ კანონით მასწავლებლებისთვის განსაზღვრულ სავალდებულო მოთხოვნებს.

გადაწყვეტილებას კანდიდატურის შერჩევასთან დაკავშირებით იღებს სკოლა. სკოლა ასევე უფლებამოსილია კონკურსების შედეგებიდან გამომდინარე განიხილოს პრაქტიკოსი მასწავლებლის ხელშეკრულების გაგრძელების საკითხი კანონმდებლობის შესაბამისად.

იმ საპენსიო ასაკს მიღწეულ მასწავლებლებს, რომლებმაც გამოცდების აპელაციის შედეგების შემდეგ გადაწყვიტეს ჯილდოზე რეგისტრაცია, ეს შესაძლებლობა 2019 წლის 19-დან 31 დეკემბრამდე ექნებათ.

[sknews.ge]