ავღანეთში ტერაქტისას დაშავებული ერთ–ერთი ჯარისკაცი ახალციხელია

„სამხრეთის კარიბჭე“ გოჩა მურადაშვილს დღეს, 12 დეკემბერს ესაუბრა. იგი თავს კარგად გრძნობს.

მისი თქმით, აფეთქება ბაზასთან ახლოს 06:00 საათზე მოხდა.

„სწრაფი რეაგირების ძალების ქვედანაყოფი სამორიგეოში ვიყავით და ამ დროს ჩვენთან ახლოს სატვირთო მანქანა აფეთქდა. მძიმედ არავინ დაშავებულა, ყველა კარგად ვართ", – ამბობს სატელეფონო საუბარში გოჩა მურადაშვილი.

მე-12 ბატალიონი ავღანეთში 10 ნოემბერს ჩავიდა. კაპრალი გოჩა მურადაშვილი ჯარში 2009 წლიდან მსახურობს, მისი ბატალიონი საქართველოში 2020 წლის მაისში დაბრუნდება.

საქართველოს თავდაცვის სამინისტრომ ბაგრამის ბაზაზე მომხდარი თავდასხმის შესახებ ინფორმაცია 10 დეკემბერს გაავრცელა.

„მე-12 ბატალიონის სამხედრო მოსამსახურეების, კაპრალების - გოჩა მურადაშვილის, სოსო კვინიკაძის და რომან გიუნაშვილის, რიგითი ილია თაყაძის და უფროსი სერჟანტის დავით ბახურაულის ჯანმრთელობის მდგომარეობა სტაბილურია და მათი ჰოსპიტალიზაცია საჭირო არ გამხდარა. მსუბუქი დაზიანებების მიუხედავად, ისინი აგრძელებენ ტერორისტების წმენდისა და სალიკვიდაციო ოპერაციაში მონაწილეობას კოალიციურ ძალებთან ერთად", – წერია უწყების მიერ გავრცელებულ განცხადებაში.

საქართველოს თავდაცვის ძალების მე-12 ბატალიონი „მტკიცე მხარდაჭერის“ სამშვიდობო მისიას ბაგრამის საავიაციო ბაზაზე ნოემბრიდან ასრულებს.

[sknews.ge]