სახელმწიფო რწმუნებულმა და მერმა მიმდინარე პროექტები დაათვალიერეს ®

ხელმძღვანელი პირები ქალაქ ახალციხეში, რუსთაველის ქუჩაზე არსებული N1 საბავშვო ბაღის შენობის რეაბილიტაციის პროცესს გაეცნენ. საბავშვო ბაღში ოთხი ჯგუფი გააგრძელებს ფუნქციონირებას, სადაც თანამედროვე სტანდარტების მქონე, კეთილმოწყობილ გარემოში 120 აღსაზრდელი შეძლებს სკოლამდელი აღზრდის უნარ-ჩვევების მიღებას.

სახელმწიფო რწმუნებულმა და მერმა ასევე, ქალაქ ახალციხის მეორე საჯარო სკოლაში მიმდინარე ინფრასტრუქტურული სამუშაოები დაათვალიერეს.

პროექტით გათვალისწინებულია სკოლის ოთხსართულიან შენობაში, ყველა სართულზე სველი წერტილებისა და ელექტრო გაყვანილობის სისტემის მოწყობა.

ხელისუფლების წარმომადგენლები ქალაქ ახალციხეში მლაშიხევის არხის (არსებული კოლექტორიდან წმ. დავითისა და კონსტანტინეს ქუჩამდე) სარეაბილიტაციო სამუშაოებსაც გაეცნენ. აღნიშნული კოლექტორის რეაბილიტაციით მიმდებარე დასახლებაში, რუსთაველისა და გვარამაძის ქუჩების მცხოვრებლებისთვის მრავალწლიანი პრობლემა გვარდება. პროექტი სახელმწიფო და ადგილობრივი ბიუჯეტიდან 657 340 ლარით ფინანსდება.

ასევე, სამხარეო და ადგილობრივი ხელისუფლების წარმომადგენლებმა ახალციხის მუნიციპალიტეტის სოფლებში კლდეში და აგარაში, ჯანმრთელობისთვის უსაფრთხო გარემოს უზრუნველყოფის ხელშეწყობის სახელმწიფო პროგრამის ფარგლებში ამბულატორიების მშენებლობის პროცესს გაეცნენ. სამუშაოები თანამედროვე სტანდარტებზე გათვლილი ერთსართულიანი შენობის აშენებას და ეზოს კეთილმოწყობას ითვალისწინებს.

სახელმწიფო რწმუნებულმა და მუნიციპალიტეტის მერმა მშენებელი კომპანიის წარმომადგენლებთან ერთად, თითოეული პროექტის მიმდინარეობა და ამ დროისთვის შესრულებული სამუშაოები ადგილზე განიხილეს.







ახალციხის მუნიციპალიტეტის მერია