საქართველოსა და პოლონეთის სასჯელაღსრულების სასწავლო ცენტრები თანამშრომლობაზე შეთანხმდნენ

მემორანდუმის მიზანია სასჯელაღსრულების სისტემის თანამშრომელთა სწავლისა და მომზადების ხარისხის გაუმჯობესება და ეფექტიანობის გაზრდა.

ორმხრივი თანამშრომლობის მემორანდუმს ხელი საქართველოს სასჯელაღსრულებისა და პრობაციის სასწავლო ცენტრის დირექტორმა მაია ხასიამ და პოლონეთის სასჯელაღსრულების სამსახურის ცენტრალური სასწავლო ცენტრის (კალიშე) დირექტორმა დანუტა კალმანმა მოაწერეს.

მემორანდუმის ხელმოწერას საქართველოში პოლონეთის რესპუბლიკის საგანგებო და სრულუფლებიანი ელჩი ანჟეი ჩიეშკოვსკი, სასჯელაღსრულების, პრობაციისა და იურიდიული დახმარების საკითხთა მინისტრი სოზარ სუბარი, მინისტრის მოადგილე სოფიო ჯაფარიძე, სასჯელაღსრულებისა და პრობაციის სასწავლო ცენტრისა და პოლონეთის სასჯელაღსრულების სამსახურის ცენტრალური სასწავლო ცენტრის (კალიშე) წარმომადგენლები დაეწსრნენ.

აღნიშნული ღონისძიება პოლონეთის დელეგაციის სამუშაო ვიზიტის ფარგლებში გაიმართა. ამავე ვიზიტის ფარგლებში შედგა ერთობლივი სამუშაო შეხვედრები პოლონეთის საელჩოში, სასწავლო ცენტრში, პრობაციის ეროვნულ სააგენტოსა და სასჯელაღსრულების დეპარტამენტში.

კალიშეს სასწავლო ცენტრის წარმომადგენლები საქართველოს სასჯელაღსრულებისა და პრობაციის სასწავლო ცენტრში სამუშაო ვიზიტით 9 ოქტომბერს ჩამოვიდნენ და საქართველოში 16 ოქტომბრამდე დარჩებიან.

[sknews.ge]