ახალციხის საკრებულოს წევრები ამომრჩეველს ანგარიშს წარუდგენენ

ადგილობრივი თვითმმართველობის კოდექსის 88-ე მუხლის შესაბამისად, მუნიციპალიტეტის მერი და საკრებულოს წევრები ვალდებული არიან, წელიწადში ერთხელ მაინც, არაუგვიანეს პირველი ნოემბრისა, მოაწყონ საჯარო შეხვედრები მუნიციპალიტეტის ამომრჩევლებთან და წარუდგინონ მათ ანგარიში გაწეული მუშაობის შესახებ, ანგარიშის განხილვისას უპასუხონ მუნიციპალიტეტის ამომრჩეველთა მიერ დასმულ შეკითხვებს.

ახალციხის მუნიციპალიტეტის საკრებულოს დეპუტატები მსგავს ანგარიშს ამომრჩეველს პირველ ნოემბერს 15:00 საათზე წარუდგენენ. როგორც საკრებულოს თავმჯდომარე, გელა ნოზაძე ამბობს, ამ დრომდე შეხევდრის მოწყობა იმის გამო ვერ მოხერხდა, რომ დეპუტატთა ნაწილი მივლინებაში იმყოფება.

„რამდენიმე დეპუტატი ფიზიკურად არ არის საქართველოში, ორი მათგანი კი მივლინებაშია. ამიტომ პირველ ნოემბერს, ამავე დარბაზში ყველა დეპუტატი, ოპოზიციიდან და პოზიციიდან ამომრჩეველს ჩვენს ანგარიშებს წარვუდგენთ. ეს შეიძლება ვინმესთვის ცოტა მოსაწყენი იყოს, მაგრამ აუცილებლობას წარმოადგენს“, - აცხადებს ნოზაძე.

თვითმმართველობის კოდექსის შესაბამისად, საკრებულოს წევრების მიერ გაწეული მუშაობის ანგარიშზე დასწრება მუნიციპალიტეტის ტერიტორიაზე რეგისტრირებულ ყველა ამომრჩეველს შეუძლია.

[თაკო ფეიქრიშვილი, ახალციხე]