არალში საკრებულოს შუალედურ არჩევნებში 'ოცნების' კანდიდატმა გაიმარჯვა

N3 საარჩევნო უბანზე ხმა არალის და წარბასთუმნის მოსახლეობამ მისცა. 1 466 ამომრჩევლიდან კენჭისყრაზე 887 მათგანი მივიდა.

დღის განმავლობაში საჩივარი არ დაწერილა, თუმცა პროცედურული დარღვევების გამო ორჯერ, რეგისტრატორებს ახსნა–განმარტების დაწერა მოუწიათ. პირველ შემთხვევაში, რეგისტრატორმა ამომრჩეველს ხელი სხვა ადგილზე მოაწერინა, მეორე შემთხვევაში კი ამომრჩევლებმა ხმა ჟურნალში ხელის მოწერის გარეშე მისცეს.

"მთელი დღის განმავლობაში აქტივობა იყო ნორმალური, 887 ამომრჩეველი მოვიდა. უბანი დაიხურა 20:00 საათზე და პროცესმა მშვიდად ჩაიარა. არჩევნების ეს ეტაპიც გავიარეთ. ბიულეტენების რაოდენობა დაემთხვა სიებს. ახლა შემაჯამებელი ოქმი დაიწერება" - განაცხადა N3 საარჩევნო უბნის თავმჯდომარემ ზაურ ჩილინგარაშვილმა.

როგორც ყველა არჩევნებზე, დღესაც "ოცნების" მხარდამჭერები სპეციალური სიებით იდგნენ და აღრიცხავდნენ, ვინ მივიდა კენჭისყრაზე და ვინ არა.

ადიგენის მუნიციპალიტეტის სოფელ არალში შუალედური არჩევნები ყოფილი დეპუტატის ლაზარე ჩილინგარაშვილის გარდაცვალების გამო გაიმართა.

[sknews.ge]