‘მომხრე ვარ საქართველოში აშშ-ს ბაზების განთავსების’ - სამხედრო ექსპერტი

ანალიტიკოსი ლუკ კოფი, რომელიც ცნობილია ინიციატივით, საქართველოს ნატოში დაჩქარებული გაწევრიანების მეთოდის შესახებ, სოციალურ ქსელში კიდევ ერთ იდეას აქვეყნებს. მისი აზრით, სირიიდან წამოსული აშშ-ს ჯარი საქართევლოში, კერძოდ, ახალქალაქში ძველი რუსული ბაზის ტერიტორიაზე შეიძლება განთავსდეს.

უსაფრთხოების ექსპერტი, თეონა აქუბარდია ამბობს, რომ ეს მხოლოდ იდეაა და ბაზების განთავსებას ორივე ქვეყნის ნება სჭირდება, როგორც შეერთებული შტატების, ასევე საქართველოს მთავრობის: „ეს არის იდეა და ამ იდეის ამაზე მეტი განხილვა უკვე კონკრეტული სამუშაო პროცესია".

მისივე თქმით, ამ ეტაპზე, იმისი განხილვა, თუ რამდენად უსაფრთხო იქნება აშშ-ს ჯარების საქართველოში განლაგება, მიზანშეწონილი არ არის: „საქართველოს უსაფრთხოებისთვის მნიშვნელოვანია ყველა შესაძლო გზების განხილვა და მუშაობა. საქართველოს აქვს კონსტიტუციაში ჩაწერილი, რომ ნატოში გაწევრიანება არის ქვეყნის ეროვნული ინტერესი, რათა უსაფრთოხების ქონა არის მნიშვნელოვანი. რა თქმა უნდა, ალტერნატივად შეიძლება იყოს განხილული ასევე შეერთებული შტატების სამხედრო ბაზების განთავსება საქართველოში, თუმცა ეს მხოლოდ და მხოლოდ იდეის დონეზეა. მიუხედავად ამისა, მე პირადად ვიქნებოდი მომხრე შეერთებული შტატების ბაზის განთავსების საქართველოში, იმიტომ, რომ ეს იქნება დამატებითი უსაფრთხოების კომპონენტი რუსული აგრესიის საპირისპიროდ“.

ექსპერტი ამბობს, რომ ამ ეტაპზე საფრთხე რუსული მხარეა, რომელიც საქართველოს ტერიტორიაზე მცოცავ აგრესიას აგრძელებს.

„რუსეთი განიხილავს საქართველოს სუვენერულ არჩევანს, როგორც საფრთხეს. ამ შემთხვევაში, ნატოში გაწევრიანება აღქმულია მათი მხრიდან, როგორც მისი ეროვნული უსაფრთხოების გამოწვევა. ნებისმიერი სამხედრო სწავლება, რომელიც საქართველოში ტარდება, ჩვენს პარტნიორებთან ერთად, განიხილება რუსეთის მიერ, როგორც საფრთხე. მაგრამ აქ საუბარია ჩვენი ინტერესი რა არის და როგორ მოვახერხებთ ამ ინტერესების უზრუნველყოფას, იმიტომ, რომ რუსეთს არა მხოლოდ ის არ მოეწონება, რომ საქართველოში სამხედრო ბაზა იყოს, არამედ არ მოსწონს ისიც, რომ ჩვენ გავხდეთ ნატოს წევრები“, - ამბობს თეონა აქუბარდია.

ანალიტიკოსმა ლუკ კოფიმ შემოთავაზება 25 ოქტომბერს სოციალური ქსელის მეშვეობით გაავრცელა.

[თაკო ფეიქრიშვილი, ახალციხე]