საღამოს ტბაში კუნძულის მოტყუებით დაუფლების საქმის განხილვა იწყება

საღამოს ტბის კუნძულის პირველი მესაკუთრე, 1951 წელს დაბადებული ე. კ–ია. მან ტბაში მდებარე 1 807 კვ.მ. ფართობი 2012 წლის 19 დეკემბერს დაირეგისტრირა. 26 დეკემბერს კი, ნასყიდობის ხელშეკრულებით, საჯარო რეესტრმა კუნძული ვ. წ–ს დაურეგისტრირა, რომელიც ასევე სოფელ განძაში ცხოვრობს.

საქართველოს ფინანსთა სამინისტროს საგამოძიებო სამსახურმა, ყალბი ოფიციალური დოკუმენტების დამზადებით და მათი გამოყენებით სახელმწიფოს კუთვნილი ქონების მოტყუებით დაუფლების ფაქტზე, ე.კ პასუხისგებაში მისცა.

„გამოძიების შედეგად მოპოვებული მტკიცებულებების საფუძველზე, 2018 წლის 21 სექტემბერს, საქართველოს სისხლის სამართლის კოდექსის 180–ე მუხლის მეორე ნაწილის „ბ“ ქვეპუნქტითა და 362–ე მუხლის პირველი ნაწილით, ბრალდებულის სახით პასუხისმგებლობაში მიეცა პირი, რომელმაც ყალბი საკადასტრო აზომვითი ნახაზისა და ყალბი ცნობის გამოყენებით, საკუთრებაში დაირეგისტრირა ნინოწმინიდის მუნიციპალიტეტის ტერიტორიაზე მდებარე ერთ–ერთ ტბაში არსებული 1 807 კვ.მ ფართობის მიწის ნაკვეთი (კუნძული)“, – განგვიცხადეს უწყებაში.

ამავე საქმეზე კიურეღიანთან ერთად პასუხისგებაში მიეცა ყალბი საკადასტრო ნახაზის დამამზადებელი პირიც. ორივე ბრალდებულს, სასამართლოს მიერ აღკვეთი ღონისძიების სახით, შეეფარდა გირაო 5-5 ათასი ლარის ოდენობით.

მიწის ნაკვეთი დღეის მდგომარეობით დაყადაღებულია.

ახალციხის რაიონული სასამართლო ორივე ბრალდებულზე, სისხლის სამართლის საქმეს, ცალ–ცალკე განიხილავს. ე. კ–ის სასამართლო სხდომა პირველ ოქტომბერსაა ჩანიშნული.

[თორნიკე ზაზაძე, ნინოწმინდა]