‘რუსთავი 2’ – მოვლენების ქრონოლოგია

დღეს, 22 აგვისტოს ცნობილი გახდა, რომ არხი დატოვა „შაბათის შუადღის“ წამყვანებმა: ნესტან ნენე კვინიკაძემ, ქეთი დევდარიანმა, ლაშა ბუღაძემ და დათო ტურაშვილმა.

დღესვე, „საერთაშორისო გამჭვირვალობა საქართველომ“ ჟურნალისტების მიერ „რუსთავი 2“-ის დატოვების ფაქტზე განცხადება გაავრცელა:

„...მიგვაჩნია, რომ ახალი მენეჯმენტი საჯაროდ გაკეთებული განცხადებების მიუხედავად, არხის კრიტიკული სარედაქციო პოლიტიკის შეცვლას ღიად ცდილობს. ცხადია, ყოველივე ეს მმართველი პარტია “ქართული ოცნება–დემოკრატიული საქართველოს” ინტერესს წარმოადგენს“, – ვკითხულობთ განცხადებაში.

შეგახსენებთ, რომ ტელეკომპანია „რუსთავი 2“ ბიზნესმენმა, ქიბარ ხალვაშმა 18 ივლისს გადაიფორმა. არხის გენერალურ დირექტორად პაატა სალია დაინიშნა, რომელმაც ნიკა გვარამია შეცვალა.

17 აგვისტოს, ნიკა გვარამიამ ახალი არხი დააფუძნა.

20 აგვისტოს, ტელეკომპანია „რუსთავი 2“-ის რამდენიმე თანამშრომელი: ნოდარ მელაძე, ნანუკა ჟორჟოლიანი, ეკა კვესიტაძე, გიორგი გაბუნია და გიორგი ლაფერაშვილი სამსახურიდან გაათავისუფლეს.

„რუსთავი 2“–ის ახალმა დირექტორმა, პაატა სალიამ ჟურნალისტების გათავისუფლების მიზეზად „ინტერესთა კონფლიქტი“ და „შიდა ომები“ დაასახელა.

ახალი მენეჯმენტის გადაწყვეტილების შემდეგ, არხი დატოვეს საინფორმაციო გადაცემა „კურიერის“ წამყვანებმა დიანა ჯოჯუამ და მიხეილ სესიაშვილმა.

არხი ასევე დატოვა სამოცამდე ჟურნალისტმა.

„რუსთავი 2“-ის ყოფილმა გენერალურმა დირექტორმა, ნიკა გვარამიამ განაცხადა, მზად არის ისინი მთავარ არხზე დაასაქმოს.
ამ დროისთვის, ტელეკომპანია „რუსთავი 2“-ის საინფორმაციო გადაცემა ეთერში არ გადის.

არხი მაუწყებლობას საინფორმაციო პროგრამების გარეშე აგრძელებს.

„რუსთავი 2“ დატოვეს გადაცემა „კვირის სხვა შუადღის“ წამყვანებმაც ლევან ბუთხუზმა, სალომე დადუნაშვილმა და ლევან ღამბაშიძემ.

[გულო კოხოძე, ახალციხე]