ახალციხის მერია: ‘სამხარეო ადმინისტრაციის შენობაში ზარალის დათვლა არ დაგვისრულებია’

რა ოდენობის ზარალი მიადგა სამხარეო ადმინისტრაციის შენობას, 15 აგვისტოს გაჩენილი ხანძრის შედეგად, ამის შესახებ ახალციხის მერიაში ზუსტი პასუხი არ აქვთ. საზოგადოებასთან ურთიერთობის სამსახურის ინფორმაციით, ზარალი უახლოეს დღეებში იქნება ცნობილი: „ინვენტარის აღწერა მოხდა და ვაჯამებთ“.

ზარალს ითვლიან სამხარეო ადმინისტრაციაშიც: „რაც დაზიანდა, ძირითადად ყველაფერი მუნიციპალიტეტის საკუთრებაა, ჩვენი მარტო რამდენიმე კომპიუტერი და ერთი კონდიციონერია დაზიანებული. დეტალური ინფორმაცია მოგვიანებით გვეცოდინება“, - განმარტავს გუბერნატორის პირველი მოადგილე, შალვა ბერძენიშვილი.

ცეცხლმა შენობაში სამუშო კაბინეტები დააზიანა, რის გამოც, სამხარეო ადმინისტრაციის ათი თანამშრომლი მუშაობას სხვა ოთახებში აგრძელებს.

„ჩვენი ოთახების მოწესრიგებამდე საკონფერენციო დარბაზში ვიმუშავებთ. თუმცა ამ დროისთვის, დენი გამორთული აქვთ, როგორც გვითხრეს, დღის მეორე ნახევარში იქნება და ჩვეულებრივად ვიმუშავებთ“, - ამბობს თვითმმართველობის ორგანოებთან ურთიერთობის სამსახურის უფროსი, ეკა ორჯონიკიძეა.

15 აგვისტოს სამხარეო ადმინისტრაციის შენობაში გაჩენილი ხანძრის შედეგად თვითმმართველობებთან ურთიერთობის სამსახურის ორი და ინფრასტრუქტურის განყოფილების ერთი ოთახი განადგურდა, სამ კაბინეტში სულ ათი თანამშრომელი მუშაობდა.

[ავთო ინასარიძე, ახალციხე]