ბორჯომში დაკავებული ექიმი სამედიცინო დაწესებულებაში არ მუშაობს

ბორჯომის სამედიცინო დაწესებულება „ჯეოჰოსპიტალში“ განმარტავენ, რომ საქართველოს პროკურატურის მიერ დაკავებული ექიმი რ.ჯ მათთან არ მუშაობდა და არც მის შესახებ იციან რამე.

„სამხრეთის კარიბჭეს“ ინფორმაციით კი, დაკავებული ექიმი, წლების განმავლობაში, სამედიცინო სფეროში დიდი წარმატებით მოღვაწეობდა და მედიცინის მეცნიერებათა დოქტორის წოდებაც აქვს მიღებული.

ადგილობრივები ამბობენ, რომ რ.ჯ–ს ბოლო წლების განმავლობაში არცერთ სამედიცინო დაწესებულებაში არ უმუშავია, თუმცა გასცემდა თუ არა ფსიქოტროპული ნივთიერებების შესაძენად ყალბ ცნობებს, მათ ამის შესახებ არაფერი სმენიათ.

საქართველოს პროკურატურამ, ბორჯომში ექიმის დაკავების შესახებ ინფორმაცია გუშინ, 31 ივლისს გაავრცელა.

საქმეზე გამოძიება მიმდინარეობს საქართველოს სსკ-ის 268-ე მუხლის მე-2 ნაწილის „ბ“ და ამავე მუხლის მე-3 ნაწილის „ა“ ქვეპუნქტებით, რაც სამსახურეობრივი მდგომარეობის გამოყენებით, დიდი ოდენობით ფსიქოტროპული ნივთიერების შესაძენად ყალბი რეცეპტის დამზადებას, გასაღების მიზნით, და გასაღებას გულისხმობს.

დანაშაულისთვის სასჯელის სახედ და ზომად გათვალისწინებულია ექვსიდან თერთმეტ წლამდე ვადით თავისუფლების აღკვეთა.

ექიმისათვის აღკვეთის ღონისძიების შეფარდებაზე, ახალციხის რაიონულ სასამართლოს ჯერ არ უმსჯელია.

[ლუბა გიორგაძე, ბორჯომი]