ახალქალაქში გაფიცულ მუშებს კომპანია დაჰპირდა, რომ ხელფასს 24 ივლისს აუნაზღაურებენ

დღეს, 23 ივლისს, ახალქალაქში გაფიცულ მუშებს კომპანია „დემირიოლსერვისის“ ცენტრალური ოფისის ხელმძღვანელობა შეხვდა: “ჩამოვიყვანე კომპანიის წარმომადგენლები და შევახვედრე მუშებს. შეთანხმდნენ, რომ აუნაზღაურდებათ აუცილებლად ხელფასი და ხვალიდან დაიწყებენ ჩვეულებრივად მუშაობას. მატარებლიდან ტვირთიც ჩამოიტვირთება. ყველაფერს თავისი წესი აქვს, ხელფასი რომ არ ჰქონდათ, უნდა მისულიყვნენ და განცხადება დაეწერათ. ამას ვეუბნებოდი, მაგრამ არ მისმენდნენ. მეც ორი თვის ხელფასი მაქვს ასაღები, მაგრამ არ ვნერვიულობდი, იმიტომ, რომ ვიცოდი, ავიღებდით“, - ამბობს „დემირიოლსერვისის“ წარმომადგენელი ახალქალაქი-მარაბდას მონაკვეთზე მურად ბუიძე.

თავად გაფიცული მუშები ამბობენ, რომ მსგავს შეთანხმებაზე არ წასულან და სამუშაოებს მანამდე არ დაუბრუნდებიან, სანამ ხელფასი არ დაერიცხებათ: „ერთ ჟურნალისტთან თქვეს, ხვალ ორ საათამდე სამი თვის ხელფასს ავუნაზღაურებთო. მეორეს უთხრეს, ხვალ ერთი თვის იქნება და დანარჩენი მერეო. აღარ ვენდობით, ხვალ ავალთ და დაველოდებით, როცა ხელფასი ბოლომდე ჩაირიცხება. მერე დავიწყებთ მუშაობას“, - ამბობს ერთ-ერთი მუშა.

ახალქალაქში რკინიგზაზე დასაქმებული მუშები ბოლო სამი კვირის განმავლობაში მეოთხედ გაიფიცნენ. ამჯერად მათ რკინიგზის ლიანდაგი გადაკეტეს და თურქეთიდან შემოსულ სატვირთო მატარებელს გზის გაგრძელების საშუალება არ მისცეს.





[თაკო ფეიქრიშვილი, ახალქალაქი]