ახალქალაქში გაფიცულმა მუშებმა ოთხის ნაცვლად ერთი თვის ხელფასი მიიღეს

დღეს, 12 ივლისს, ბაქო-თბილისი-ყარსის რკინიგზაზე დასაქმებულ მუშებს მხოლოდ ერთი თვის ანაზღაურება მისცეს. თანამშრომლები კი ოთხი თვის დავალიანების დაფარვას ითხოვდნენ.

„დღეს, 6 საათი ხდებოდა რომ ჩაგვერიცხა, მხოლოდ ერთი თვის. არადა თებერვლის მერე ხელფასი არ აგვიღია. გვითხრეს სრულად აგინაზღაურებთო, მაგრამ, მოგვატყუეს. ხვალ, კიდევ გვინდა კომპანიის წამომადგენლებთან შეხვედრა. ჩვენც ცოდოები ვართ, კრედიტები გვაქვს და ხელფასს ვერ ვიღებთ, რომ გადავიხადოთ“, - ამბობს ერთ-ერთი მუშა.

მუშები ამბობენ, რომ გაფიცვას იქამდე აგრძელებენ, ვიდრე სახელფასო დავალიანებას მოლომდე არ აუნაზღაურებენ.

სამშენებლო კომპანია „დემირიოლსერვისის“ ახალქალაქი-კარწახის უბნის უფროსი, მურად ბუაძე ამბობს, რომ თანამშრომლები ხელფასს ეტაპობრივად მიიღებენ: „მე ვიცი, რომ დაერიცხათ. ერთი თვე ხომ მიიღეს, დანარჩენ თვეებსაც მიიღებენ. მეც მაგათნაირი თანამშრომელი ვარ“, - ამბობს ბუაძე.

ახალქალაქში ბაქო-თბილისი-ყარსის რკინიგზაზე დასაქმებული მუშები პროტესტის ნიშნად, სამ ივლისს გაიფიცნენ. მათ ოთხი თვის ხელფასი არ მიუღიათ. კომპანიის ხელმძღვანელობის დაპირების შემდეგ, თანამშრომლები სამუშაოზე ხუთ ივლისს დაბრუნდნენ, 10 ივლისს კი გაფიცვა ისევ გააგრძელეს. მუშები ოთხთვიან დავალიანებას აპროტესტებენ.

[თაკო ფეიქრიშვილი, ახალქალქი]