ახალქალაქსა და ნინოწმინდაში ყინვამ კარტოფილის ნათესები დააზიანა

ჰაერის ტემპერატურის მკვეთრი დაცემის გამო, ჯავახეთის სოფლებში კარტოფილის ნათესები მოიყინა. ფერმერები ამბობენ, რომ ივლისში მსგავსი ტემპერატურა – მინუს ნიშნულით არ ახსოვთ: "ივნისის დასაწყისში იყო ხოლმე ყინვა, მაგრამ ივლისში ასეთი ყინვა არ ყოფილა. ჯერ-ჯერობით დიდი დაზიანება არ გვაქვს, დაახლოებით 5%-იანი ზარალი იქნება, გააჩნია კარტოფილის ჯიშს, მაგრამ ახლა საჭიროა ყურადღების მიქცევა, რომ დაავადებები არ გაჩნდეს", - ამბობს ასოციაცია "ახალქალქის კარტოფილის" თავმჯდომარე მახარე მაცუკატოვი.

მისი თქმით, შესაძლებელია, მცენარის დაზიანებული ღეროდან გარკვეული დაავადებები გაჩნდეს. ამიტომ საჭიროა ფუნგიციდებით, მიკროელემენტებითა და სტიმულატორებით შეწამვლა: "ერთ-ორი დღის შემდეგ გარკევული წამლობები იქნება საჭირო კარტოფილის ნარგავებისთვის. სხვა კულუტურებს დიდად არ შეხებია, თან ჯავახეთში სხვა ბოსტნეულს იშვიათად ვთესავთ. დიდი ზარალი არ იქნება, თუ, რა თქმა უნდა, ფერმერი უწამლებს".

გარემოს ეროვნული სააგენტოს ინფორმაციით, ორი ივლისიდან საქართველოს მთელს ტერიტორიაზე ტემპერატურა მოიმატებს.



[თაკო ფეიქრიშვილი, ახალქალაქი]