'ფერიების სამყაროში'

ადიგენში, სოფელ ქიქინეთში, რომელიც, მესხეთის ქედის სამხრეთ კალთაზე, ზღვის დონიდან 1460 მეტრზე მდებარეობს ოთხკლასიანი სკოლაა. სკოლაში ექვსი პედაგოგი და ექვსი მოსწავლეა.


კლასში, დაფაზე ეს ნახატია. სკოლა კი ნამდვილად არ ჰგავს ფერიების სამყაროსა და ზღაპრებში წარმოდგენილ სკოლას.


„სკოლა 1946 წელს ევგენი ხარაძემ ააშენა. საბჭოურ პერიოდში „პუნქტი“ იყო, მერე პუნქტიც გაუქმდა და 1994 წელს ისევ სკოლა გაიხსნა. ახლა აქ მხოლოდ დაწყებითი კლასებია. ქიქინეთის სკოლა სოფელ წახნის საჯარო სკოლას ექვემდებარება“, – გვითხრა სკოლის პედაგოგმა, ნენე შუბითიძემ.


სკოლაში ორი კლასია – ხუთი მერხით. აქედან ერთ კლასში სამასწავლებლოა მოწყობილი.


ეს სკოლის შესასვლელია, ზამთარში სპორტული დარბაზის ფუნქციით.


ნენე შუბითიძე, მასწავლებელი – შემოხსნილი იყო შენობა მთლიანად. მტვერი ჩამოდიოდა, წვიმაც და თოვლიც. ორი ოთახი გაკეთდა, თუმცა სკოლას რემონტი სჭირდება. ინტერნეტი არ გვაქვს. სინათლეც ორი წელია რაც შემოგვიყვანეს. ადრე ერთ კლასში ექვსი – შვიდი მოსწავლე გვყავდა. ტოვებენ სოფელს. მძიმეა აქ ცხოვრება, სკოლაში როცა მოვდივართ უკვე დაღლილები ვართ, მაგრამ მოსწავლეებს ენერგიას ვერ მოაკლებ, პირიქით, როცა ვიცი, რომ ბავშვებს განსაკუთრებულად ვჭირდები გაათმაგებული ძალით ვმუშაობ.


ბავშვების საყვარელი თამაში ფეხბურთია. მეკარე გოგოა.

ადიგენის საგანმანათლებლო რესურსცენტრში განმარტავენ, რომ 2019 წელს შენობის სრული რეაბილიტაცია იგეგმება, წელს კი სკოლა საკუთარი შემოსავლებით, აივანს გაარემონტებს.









[გულო კოხოძე, ადიგენი]