ნინოწმინდა–ახალციხის გზის 15 კილომეტრიანი მონაკვეთი შენდება

დღეს, პირველ მაისს, რეგიონული განვითარებისა და ინფრასტრუქტურის მინისტრის პირველი მოადგილე ირაკლი ქარსელაძე ჯავახეთს სტუმრობს. მან სამცხე–ჯავახეთის რწმუნებულთან და ადგილობრივი თვითმმართველობის წარმომადგენლებთან ერთად გზის სამშენებლო სამუშაოები დაათვალიერა.

მისი თქმით, ამ დროისთვის სამცხე–ჯავახეთში გზის რეაბილიტაციისთვის 25 პროექტი ხორციელდება: "ჯამში 128 კილომეტრის მშენებლობა იგეგმება და ამისთვის 84 მილიონი ლარი იხარჯება. წელს ნოემბრამდე 25–დან 20 პროექტი დასრულდება".



კონკრეტულად, ახალციხე–ნინოწმინდის სარეაბილიტაციო მონაკვეთი სოფლებს, გორელოვკას და ჟდანოვს გაივლის და საქართველო-სომხეთის საზღვართან დასრულდება. ამ გზით სარგებლობენ, როგორც ადგილობრივები, ასევე, სომხეთის მიმართულებით მოძრავი ავტომანქანები, ხორციელდება საზტრანზიტო გადაზიდვებიც.

ათეული წელია ამ მიმართულებით გზის საფარი დაზიანებულია. გარკვეულ მონაკვეთებში ასფალტი საერთოდ აღარაა, ამიტომ ტრანსპორტის გადაადგილება ფერხდება.

პროექტის ფარგლებში გზის სრული რეაბილიტაცია იგეგმება. როგორც სამინისტროში აცხადებენ: "გაფარდოვდება არსებული გზის სიგანე, რეაბილიტირდება სამი რკინაბეტონის ხიდი და წყალგამტარი მილები. მოწყობა მოსახლეობის ეზოებში შესასვლელები და ადგილობრივ გზებთან მიერთებები. ასევე, გათვალისწინებულია საავტომობილო გზის საგზაო ნიშნებით აღჭურვა, ზღუდარების მოწყობა და გზის სავალი ნაწილის მონიშვნა. პროექტის დასრულების შემდეგ, ახალციხიდან ნინოწმინდის მიმართულებით სომხეთის საზღვრამდე გადაადგილება უსაფრთხოდ და კომფორტულად იქნება შესაძლებელი".

უწყების ცნობით, ზამთრის მკაცრი კლიმატური პირობების გამო სამუშაოების სპეციფიკიდან გამომდინარე, სამუშაოები დროებით შეჩერებული იყო. მეტეოროლოგიური პირობების გაუმჯობესებისთანავე სამუშაოები განახლდა და აქტიურად მიმდინარეობს.

პროექტი სახელმწიფო ბიუჯეტიდან ფინანსდება და მისი ღირებულება 13 808 673 ლარია. სამუშაოები 2018 წლის ივლისში დაიწყო და 2 კმ-იან მონაკვეთზე დაგებულია ასფალტ-ბეტონის საფარი, ხოლო 2 კმ-იან მონაკევთზე მოწყობილია მიწის ვაკისი. ამ დროისთვის სარეაბილიტაციო მონაკვეთზე მიწის სამუშაოები მიმდინარეობს.

"საერთაშორისო მნიშვნელობის ახალციხე-ნინოწმინდას (სომხეთის რესპუბლიკის საზღვარი) საავტომობილო გზაზე, მიმდინარე წელს პროექტი მომზადდება და სარეაბილიტაციო სამუშაოები ზაფხულში დაიწყება დაზიანებულ 5 კმ-იან მონაკვეთზე (კმ91-კმ97)", – აცხადებენ ინფრადტურტურის სამინსიტროში.



[sknews.ge]