ლარები, დასახლება ექვსი კომლით [Photos]

ბორის ვაშაკიძე 42 წელია რკინიგზაში მუშაობს, წლების განმავლობაში მემანქანე იყო. ამბობს, რომ ახალციხე–თბილისის მიმართულებით მატარებელი ხშირად მოძრაობდა, ახლა კი თითქმის გაუქმებულია. წელიწადში რამდენჯერმე მხოლოდ სამხედრო ვაგონები დადის, რომელსაც „ორფოლოს“ პოლიგონზე მძიმე ტექნიკა გადაჰყავს.


დასახლება 1940 წელს გაჩნდა. ლარებში ახლა ექვსი ოჯახი ცხოვრობს, ნაწილი იმერეთიდანაა ჩამოსული. დასახლებაში მცხოვრები ექვსივე ოჯახის წევრი რკინიგზაში მუშაობდა.




59 წლის დავით ფანქველაშვილი წლების განმავლობაში რკინიგზაში მუშაობდა, ახლა პენსიაზეა გასული, მისი მამაც რკინიგზელი იყო. იხსენებს, რომ ლარებთან სამი რკინიგზის ლიანდაგი იყო, მეისრეები კი მატარებლებს მიმარულებებს აძლევდნენ.

მისი თქმით, ახლა სარკინიგზო ხაზი სავალალო მდგომარეობაშია, სადგურის შენობა დანგრეულია, ლიანდაგზე ფიჭვებია ამოსული, „შპალები“ კი დამპალია.



„ბოლოს აღარც მახსოვს როდის გაიარა მატარებელმა, სამგზავრო მატარებლები საერთოდ მოიხსნა. თვე გავა მატარებელი არ გამოჩნდება. ერთი ვაგონი აივლის ხოლმე, ხაზს ამოწმებენ, მაგრამ ამას შემოწმება რად უნდა, დამპალია ყველაფერი. ჰაერშია ხაზები, გვეშინია რომ გვძინავს მატარებელი ლიანდაგიდან არ გადმოვიდეს და ჩვენს სახლებში არ შემოვარდეს.“, – ამბობს დავით ფანქველაშვილი.




ლარებში 30 წელია ცხოვრობს ლომიძე მადონაც: „ისეთი ადგილია სულ კლდეა, აქ არაფერი მოდის, ხაშურელია ჩემი მეუღლე, 90–იან წლებში უშუქობა და გაჭირვება რომ იყო აქ გადმოვედით საცხოვრებლად, მისი ბებიის–და პაპის სახლში ვცხოვრობთ".









[თინათინ ზაზაძე, ბორჯომი]