წლის ყველაზე ხმაურიანი პროექტი ურაველში ვერ განხორციელდა

2018 წელი ისე სრულდება, რომ ახალციხის მერმა ზაზა მელიქიძემ ურაველში მცხოვრებლებთან ექვსი სოფლის გასარწყავიანების პროექტთან დაკავშირებით შეთანხმებას ვერ მიაღწია.

„ახალი არაფერია. თან ჯერ ზამთარია, სიცივეებია, გაზაფხულზე რა იქნება არ ვიცით“, – გვითხრეს მერიაში.

ახალციხის მუნიციპალიტეტის მერმა ზაზა მელიქიძემ, პირველ ნოემბერს საკრებულოს სხდომაზე დეპუტატებთან განაცხადა: „შესაძლოა გრანტი დავკარგოთ. ურავლელებთან მოლაპარაკებებს ვმართავთ და ახალწლამდე მათ ალბათ ერთხელ კიდევ შევხვდები“.

მერიაში გვითხრეს, რომ ამ სხდომის შემდეგ მერი ურავლელებს არ შეხვედრია.

ურაველში, ადგილობრივების პროტესტით უკვე მერვე თვეა შეჩერებულია პროექტი, რომელიც ექვსი სოფლის გასარწყავიანებას გულისხმობს და იაპონიის საელჩო აფინანსებს. პროექტი, რომლის მიხედვითაც სარწყავი სისტემა უნდა მოეწყოს 30 წლის წინ ჩატარებულ კვლევას ეყრდნობა. ამ პროექტის ნაწილი გასაიდუმლოებულია, მშენებლობას კი აწარმოებს ახალციხის მერის ყოფილი კომპანია, რომელსაც ახლა მისი ცოლისძმა ფლობს.

[ლუბა გიორგაძე, ახალციხე]