ურაველში წყლის პროექტი მხოლოდ მოსახლეობის თანხმობის შემთხვევაში განხორციელდება

ახალციხის მუნიციპალიტეტის მერიაში აცხადებენ, რომ ურაველში ექვსი სოფლის სარწყავი წყლის პროექტი ჯერ კიდევ შეჩერებულია. ადგილობრივ თვითმმართველობასა და სამცხე–ჯავახეთის გუბერნიაში აცხადებენ, რომ ურაველში პროექტი მხოლოდ იმ შემთხვევაში განხორციელდება, თუ მოსახლეობა იქნება თანხმა.

„ამ დროისთვის პრობლემა გადაწყვეტილი არ არის. მიმდინარეობს საკითხზე მუშაობა. პროექტი განხორციელდება იმ შემთხვევაში თუ მოსახლეობა არ იქნება წინააღმდეგი“, – გვითხრა სამცხე–ჯავახეთის გუბერნატორმა ბესიკ ამირანაშვილმა.

ურაველში ადგილობრივები კი ამბობენ, რომ სოფელში აღნიშნული პროექტის განხორციელებას არ დაუშვებენ: "ბოლო დროს აღარავინ ყოფილა მოსული სოფელში ამ საკითხის განსახილველად, მაგრამ როცა ჩატარდა ჩვენთან შეხვედრები, ვთქვით, რომ არავის მივცემთ უფლებას აქედან წყალი წაიყვანონ და მდინარე დააშრონ. ამაზე თანახმა სოფელში არავინ იქნება", – ამბობს ურაველში მცხოვრები ბეგლარ კაპანაძე.

შეგახსენებთ, რომ ურაველში, ადგილობრივების პროტესტით შეჩერებული პროექტი, რომელიც ექვსი სოფლის გასარწყავიანებას გულისხმობს, 30 წლის წინ ჩატარებულ კვლევას ეყრდნობა. ამ პროექტის ნაწილი გასაიდუმლოებულია, მშენებლობას კი აწარმოებს ახალციხის მერის ყოფილი კომპანია, რომელსაც ახლა მისი ცოლისძმა ფლობს.

[თამუნა უჩიძე, ახალციხე]