გურჯაანში აქციის მონაწილები და სამართალდამცავები ერთმანეთს დაუპირისპირდნენ

გურჯაანის მუნიციპალიტეტის სოფელ ველისციხეში „ნაციონალური მოძრაობის“ წარმომადგენლებსა და სამართალდამცველებს შორის კვლავ დდაძაბული ვითარებაა. აქციის მონაწილეები და სამართალდამცავები ეერთმანეთს ფიზიკურად დაუპირისპირდნენ.

„ნაციონალური მოძრაობის“ აქციის მონაწილეები სამართალდამცველების კორდონის გარღვევას ცდილობენ. დაზიანებულია როგორც აქციის, ასევე სამართალდამცველების მანქანები.

აქციის მონაწილეები თელავის მიმართულებით ფეხით აპირებდნენ გზის გაგრძელებას, თუმცა ეს გადაწყვეტილება შეცვალეს.

შეგახსენებთ, რომ კახეთის ცენტრალურ გზაზე ავტომობილების გადაადგილების შეფერხებასთან დაკავშირებით შსს–მ განცხადება გაავრცელა.

„შინაგან საქმეთა სამინისტრო 16 დეკემბერს, პრეზიდენტის ინაუგურაციაზე დასასწრებად ქვეყანაში ჩამოსული დელეგაციების, ღონისძიებაზე დამსწრე მაღალი რანგის და მოწვეული ყველა სტუმრის უსაფრთხოებას დაიცავს. თელავში, საქართველოს მე-5 პრეზიდენტის ინაუგურაციის ცერემონიას სხვადასხვა ქვეყნის წარმომადგენელი დაესწრება.აღნიშნული ღონისძიების გამო, კახეთის მიმართულებით და ქალაქ თელავში საავტომობილო გზებზე ტრანსპორტის მოძრაობა დროებით შეიზღუდება“, – ნათქვამია უწყების განცხადებაში.

შეგახსენებთ, რომ საქართველოს მეხუთე პრეზიდენტის, სალომე ზურაბიშვილის ინაუგურაცია დღეს, 16 დეკემბერს 15:00 საათზე თელავში, ერეკლე მეორის სასახლეში დაიწყება.

ინაუგურაციის პარალელურად გაერთიანებული ოპოზიცია აქციას გამართავს. აქციაში მონაწილეობის მისაღებად ოპოზიციის წარმომადგენლები წავიდნენ სამცხე–ჯავახეთიდანაც, თუმცა ისინიც ვერ ახერხებენ დანიშნულების ადგილამდე მისვლას.

[sknews.ge]