უხილავი მოქალაქეები – 3 დეკემბერი შშმ პირთა უფლებების დაცვის დღეა

40 წლის შუშანიკ რაისიანი პირველი ჯგუფის ინვალიდია. ყოველდღიურ გადაადგილდებაში მას ძმა, არმენი ეხმარება: „შუშანიკს დაუხმარებლად სიარული არ შეუძლია, ეტლით ქუჩაში ვასეირნებ ხოლმე, მაგრამ ქალაქში რომ გავიყვანო, ბორდიურებზე ხელით აწევა მომიწევს, ამიტომ სახლიდან შორს ვერ მიმყავს“.

შშმ პირებთან ახალციხეში რამდენიმე არასამთავრობო ორგანიზაცია მუშაობს. მათ შორისაა „ტალიტა კუმი“, რომელსაც 22 ბენეფიციარი ჰყავს. „ის ადგილები, სადაც პანდუსებია მოწყობილი, იმდენად დიდი დახრის კუთხე აქვს, რომ დამოუკიდებლად ეტლით მოსარგებელეებისთვის გადაადგილება შეიძლება სავალალო აღმოჩნდეს“, – ამბობს ფსიქოთერაპიული კაბინეტის კოორდინატორი გიორგი ჩილინგარაშვილი.

ეტლით მოსარგებლეების გარდა სპეციალური ინფრასტრუქტურა სჭირდებათ უსინათლოებსაც. ქალაქში 100–მდე მხედველობა დაქვეითებულია, თუმცა ახალცხიეში არცერთი ხმოვანი გადასასვლელი არაა.

61 წლის გიორგი ნათენაძე ახალციხის უსინათლოთა კავშირის 110 ბენეფიციარიდან ერთ–ერთია. მისი თქმით, უსინათლოები გარეთ გამოსვლას ერიდებიან: „15% მხედველობა მაქვს, ქუჩაში მძღოლების იმედად გადავდივარ და ყოველთვის მითმობენ გზას, მაგრამ უსინათლო ადამიანები ხშირად არც კი გამოდიან გარეთ, ჩვენთვის რთულია სიარული. თუ ხმოვან გადასასვლელებს დააყენებენ, მარტი მე კი არა, ყველა უსინათლო ბედნიერი იქნება“.



შშმ პირთა უფლებების დაცვის საერთაშორისო დღესთან დაკავშირებით, ახალციხის მუნიციპალიტეტის მერიამ 247 შშმ პირს, რომელთა შორის 37 მხედველობა დაქვეითებულია, 100–100 და 75–75 ლარი ჩაურიცხა. თუმცა, უწყებაში ვერ აკონკრეტებენ, 2019 წელს შშმ პირთა ადაპტირებისთვის ქალაქში რა სამუშაოები განხორციელდება და ბიუჯეტიდან ამისთვის რა თანხა გაიწერება.

„მომავალი წლის ბიუჯეტით, პანდუსების მოწყობა გათვალისწინებულია, ვგეგმავთ, რომ ფაქტიურად ყველგან ინფრასტრუქტურა მოვაწესრიგოთ. შემიძლია გითხრათ, რომ 2019 წლის ბიუჯეტის პროექტში შშმ პირებისთვის გარემოს ადაპტირების საკითხი ნამდვილად დგას, ინფრასტრუქტურა ეტაპობრივად მოწესრიგდება“, – გვითხრა ახალციხის მერის მოადგილემ რუბენ კარაპეტიანმა, რომელიც მერიაში არსებულ შშმ პირთა საკითხებზე მომუშავე საბჭოს თავმჯდომარეცაა.

ჩვენ შეკითხვაზე, რას გეგმავს მერია ხმოვანი შუქნიშნების შესახებ, კარაპეტიანი გვპასუობს: „ეს ძალიან მნიშვნელოვანი საკითხია, ჩვენ შევისწავლით და აუცილებლად გავითვალისწინებთ ხმოვანი შუქნიშნების მოწყობას“.

შშმ ადამიანების უფლებების, თანასწორობისა და ღირსების საპატივსაცემოდ, მსოფლიო შეზღუდული შესაძლებლობის მქონე პირთა საერთაშორისო დღეს სამ დეკემბერს აღნიშნავს.

[ავთო ინასარიძე, ახალციხე]