შსს: 2018 წელს ქალთა მკვლელობების მაჩვენებელი 58%-ით შემცირდა

შინაგან საქმეთა სამინისტროს ინფორმაციით, 2018 წლის 10 თვეში მოკლული იქნა 11 ქალი, რომელთაგან ხუთი ოჯახის წევრმა, ხოლო ექვსი - სხვა პირებმა მოკლეს.

2018 წელს ოჯახის წევრის მიმართ ჩადენილი ხუთი მკვლელობიდან:

• ერთ შემთხვევაში შვილმა მოკლა დედა;

• ერთ შემთხვევაში დამ - და;

• ერთ შემთხვევაში ძმამ - და;

• ერთ შემთხვევაში მამინაცვალმა - გერი;

• ერთ შემთხვევაში მოხდა იმ პირის მკვლელობა, რომელთანაც დანაშაულის ჩამდენი პირი ერთიან საოჯახო მეურნეობას ეწეოდა.

2018 წელს სხვა პირის მიერ ჩადენილი ექვსი მკვლელობიდან - ერთი ფაქტი ჩადენილია პარტნიორის მიერ.

2018 წლის იანვარში უწყებაში შეიქმნა ადამიანის უფლებათა დაცვის დეპარტამენტი, რომლის ერთ-ერთი ძირითადი მიმართულებაა ქალთა მიმართ ძალადობის პრევენცია და თითოეულ ფაქტზე დროული რეაგირებისა და ეფექტიანი გამოძიების უზრუნველყოფა.

ადამიანის უფლებათა დაცვის დეპარტამენტისა და სამინისტროს ტერიტორიული ორგანოების მიერ განხორციელებული კომპლექსური ინსტიტუციური და შინაარსობრივი რეფორმების შედეგად, 2018 წელს მნიშვნელოვნად გაიზარდა ქალთა მიმართ ძალადობის შემთხვევებზე მომართვიანობა, ძალადობისა და ოჯახური დანაშაულის 4 000-ზე მეტ შემთხვევაზე დაიწყო გამოძიება, ხოლო 3 000-ზე მეტი პირის მიმართ - სისხლისსამართლებრივი დევნა.

ამასთან, პარლამენტში იხილება შინაგან საქმეთა სამინისტროს მიერ ინიცირებული კანონპროექტი, რომლითაც გენდერული ნიშნით დანაშაულის ჩადენა სისხლის სამართლის კოდექსის მთელი რიგი მუხლებისთვის (მათ შორის მკვლელობისთვის) დამამძიმებელ გარემოებად არის გათვალისწინებული.

გასული ორი წლის სტატისტიკა კი ასეთია:

• 2017 წელს მეუღლის ან/და ყოფილი მეუღლის მიერ ქალის მკვლელობის 10 ფაქტი დაფიქსირდა.

• 2016 წელს მოკლეს 32 ქალი, რომელთაგან 14 ოჯახის წევრმა, ხოლო 18 - სხვა პირმა მოკლა.

• 2017 წელს მოკლეს 26 ქალი, რომელთაგან 14 ოჯახის წევრმა მოკლა, ხოლო 12 - სხვა პირმა.

[sknews.ge]