სიტყვიერი გაფრთხილება ადმინისტრაციული რესურსის გამოყენებისთვის

ნინოწმინდის საოლქო კომისიამ საკრებულოს აპარატის უფროსის არფიკ სოღოიანის მიერ ზურაბიშვილის სააგიტაციო მასალის საკრებულოს ფეისბუქის გვერდზე გამოქვეყნება ადმინისტრაციული რესურსის გამოყენებად მიიჩნია და საქმე სასამართლოს გადასცა.

სასამართლომ კი არფიკ ტოროიანს ადმინისტრაციული რესურსის გამოყენებისთვის მხოლოდ სიტყვიერი გაფრთხილება მისცა.

„გადაწყვეტილება ჯერ არ ჩაგვბარებია, მაგრამ მოსამართლემ გადაწყვეტილების მიზეზად განმარტა, რომ არფიკ სოღოიანს შეცდომა პირველად მოუვიდა, თან ფაქტს მნიშვნელოვანი გავლენა არ მოუხდენია, ამიტომ ვეთანხმებით ამ გადაწყვეტილებას და აღარ ვიდავებთ“, – გვითხრა ნინოწმინდის საოლქო კომისიის თავმჯდომარის მოადგილე გია გაჩეჩილაძემ.

სასამართლო გადაწყვეტილებას არ ეთანხმება „ახალგაზრდა იურისტთა ასოციაციის იურისტი“ ქეთი ბებიაშვილი. ნინოწმინდის საოლქო კომისიას საჩივრით სოწრედ მან მიმართა. ბებიაშვილი სოღიანის 2 000 ლარით დაჯარიმებას ითხოვდა.

„ადმინისტრაციული კოდექსი ჯარიმის გარდა სიტყვიერ შენიშვნასაც ითვალისწინებს, მაგრამ ჩვენ მაინც არ ვეთანხმებით სასამართლოს გადაწყვეტილებას. მიმაჩნია, რომ ეს არის მნიშვნელოვანი საკანონმდებლო ხარვეზი, ჩვენ მხარე რომ ვყოფილიყავით, აუცილებლად გავაგრძელებდით დავას აღნიშნულზე, მაგრამ სასამართლოში მომჩივანი და მხარე ამ შემთხვევაში არის ნინოწმინდის საოლქო კომისია და მისთვის ეს გადაწყვეტილება მისაღები აღმოჩნდა“,– ამბობს ბებიაშვილი.

შეგახსენებთ, რომ ნინოწმინდის მუნიციპალიტეტის საკრებულოს ფეისბუქის ოფიციალურ გვერდზე, ორ ოქტომბერს, პრეზიდენტობის კანდიდატის სალომე ზურაბიშვილის აგიტაციის შემცველი მასალა გამოქვეყნდა. ნინოწმინდის საოლქომ შესაძლო სამართალდარღვევა სოღოიანს, საარჩევნო კოდექსის 48 მუხლის პირველი პუნქტის ბ ქვეპუნქტით დაუდგინა, რაც გულისხმობს „საქართველოს ხელისუფლების ან ადგილობრივი თვითმმართველობის ორგანოებისა და იმ ორგანოებისათვის, რომლებიც საქართველოს სახელმწიფო ბიუჯეტიდან ფინანსდებია (გარდა პოლიტიკური პარტიებისა) განკუთვნილი საკომუნიკაციო საშუალებების, საინფორმაციო მომსახურებებისა და სხვადასხვა სახის ტექნიკის გამოყენება“.

[ლუბა გიორგაძე, ნინოწმინდა]