‘დაუფასდათ წინასაარჩევნო აქტიურობა‘ – საკადრო ცვლილებები ასპინძის საბავშვო ბაღებში

2017 წლის თვითმმართველობის არჩევნებზე, ასპინძის მერობისთვის, ახლანდელი მერი როსტომ მაგრაქველიძე და მაშინდელი გამგებელი, ლევან ცაბაძე იბრძოდნენ. მაგრაქველიძე კენჭს „ოცნებიდან“ იყრიდა, ცაბაძე კი დამოუკიდებელი კანდიდატი იყო. ბორჯომის სუს-ის უფროსს, გიორგი ინასარიძეს, სწორედ დამოუკიდებელი კანდიდატის მხარდამჭერებზე ზეწოლაში ადანაშაულებდნენ.

ინასარიძეების ოჯახი და ლევან ცაბაძე ერთმანეთს წლების წინ დაუპირისპირდნენ. მიზეზი ისაა, რომ ცაბაძემ გამგებლობის პერიოდში, გიორგი ინასარიძის დედა, მაია სანდოძე, ბაღების გაერთიანების უფროსობიდან გაათავისუფლა.

წინასაარჩევნო პერიოდში, მაია სანდოძე არ მალავდა, რომ მისი ოჯახი მხარს როსტომ მაგრაქველიძეს უჭერდა, მისი შვილის მხრიდან კი ვინმეზე რაიმე ტიპის ზეწოლას უარყოფდა. მას შემდეგ, რაც როსტომ მაგრაქველიძე ასპინძის მერი გახდა, მაია სანდოძე დაბაში ნომერ მეორე ბაღის მენეჯერად დანიშნეს. „არ მინდა თქვენთან საუბარი“, – გვითხრა მან და ტელეფონი გაგვითიშა, მას შემდეგ რაც გაიგო, რომ შეკითხვები მის ახალ პოზიციას უკავშირდებოდა.

მეორე ბაღის მენეჯერად მანამდე ლალი ზაზაძე მუშაობდა. აქედან იგი პირველ ბაღში მეთოდისტად გადაიყვანეს. ყოფილ მენეჯერს დღეს ამაზე საუბარი არ სურს: „თანამშრომლებთან რაღაც შეხვედრა მაქვს, უხერხულია, არ მცალია“. თვითმმართველობის არჩევნებზე ზაზაძე მხარს მაგრაქველიძის კონკურენტს, ლევან ცაბაძეს უჭერდა. მაშინ მან ცაბაძის მხარდამჭერთა სიაში ხელიც მოაწერა და ეს „სამხრეთის კარიბჭესთან“ სატელეფონო საუბარში დაადასტურა.

საბავშვო ბაღებში საკადრო ცვლილებებს ბაღების გაერთიანების ხელმძღვანელი, ელისო ბექაური ასე განმარტავს: „ლალი ზაზაძე პროფესიით საბავშვო ბაღის მეთოდისტია და მეთოდისტად ამიტომ გადავიყვანეთ. რაც შეეხება სანდოძეს იგი 30 წელი ამ სფეროში მუშაობდა და ვიფიქრე, რომ მენეჯერის პოზიციაზე გამოდგვადგებოდა. ბუნებრივია, ეს საკითხი მერთან შევათანხმე“.

ასპინძის მუნიციპალიტეტის მერი როსტომ მაგრაქველიძე ადასტურებს, რომ მაია სანდოძის დანიშვნა მასთან შეთანხმებული იყო: „აქ არჩევნები არაფერ შუაშია, მე არ ვიცი მისი ოჯახი ვის უჭერდა მხარს. ჩემთან შტაბში არცერთი არ ყოფილან, ეგრე 4 000–მა კაცმა მომცა ხმა. სანდოძის დანიშვნის შესახებ ააიპ–ის უფროსმა მითხრა, მე ჩემი ყველა ააიპ–ის ხელმძღვანელის პოზიციას პატივს ვცემ და დავეთანხმე“.

თუმცა, ვიდრე ბაღებში საკადრო ცვლილებები განხორციელდებოდა, ასპინძაში იმ ააიპ–ების ხელმძღვანელები შეიცვალნენ, რომლებიც მაგრაქველიძეს არჩევნებზე მხარს არ უჭერდნენ. ასეთები სწორედ ბაღების გაერთიანების ხელმძღვანელი ნანა ტივაძე და კეთილმოწყობის სამსახურის უფროსი ნუგზარ ელიზბარაშვილი იყვნენ. არჩევნებამდე ტივაძემ ხელი ცაბაძის მხარდამჭერთა სიაში მოწერა. ელიზბარაშვილი კი ღიად აცხადებდა, რომ ისიც დამოუკიდებელ კანდიდატს აძლევდა ხმას. მას შემდეგ რაც მუნიციპალიტეტის მერი როსტომ მაგრაქველიძე გახდა, სამსახურის დატოვება სწორედ ამ სამსახურების ხელმძღვანელებმა გადაწყვიტეს.

ასპინძის მუნიციპალიტეტის მერიის თანამშრომლები პირად საუბრებში ამბობენ, რომ ის ვინც მაგრაქველიძეს არჩევნებში მხარს უჭერდა დაუფასეს და შესაბამის პოზიციებზეც დანიშნეს, ცაბაძის მხარდამჭერები კი დააქვეითეს, ან სამსახურებიდან გაათავისუფლეს. თავად ლევან ცაბაძე დარწმუნებულია, რომ საკადრო ცვლილებებს მაგრაქველიძე არ წყვეტს: „გამოჩნდა ვისი ხელიც ერია მაგ არჩევნებში. სანდოძის შვილების გავლენით ხდება ასპინძაში ეგ რაღაცები. ალბათ ვიღაცებს წინასაარჩევნოდ მხარდაჭერა დაუფასეს კიდეც“.

[თამუნა უჩიძე, ასპინძა]