‘აქ რელიგიური ტურიზმი უნდა განვითარდეს’ – ზურაბიშვილი ახალციხეში ამომრჩევლებს ხვდება

მესხეთის თეატრში შეკრებილებს პრეზიდენტობის კანდიდატის გამოსვლამდე, მისი ბიოგრაფიის შესახებ ფილმი უჩვენეს.

„კულტურა, ისეთი ქვეყნისთვის როგორიც საქართველოა ძალიან მნიშვნელოვანია. კულტურული ცხოვრება აუცილებელია რეგიონების გაცოცხლებისთვის.
საზოგადოება არის იქ სადაც არის კულტურა და ეს ორი რამ უნდა გავაერთიანოთ და ამაში როგორც პრეზიდენტი დაგეხმარებით“, – მიმართა ზურაბიშვილმა ამომრჩევლებს – „ორი წლის წინ ვიყავი აქ და გაცოცხლებული არ იყო რაბათის სასახლე და შარშან რომ მოვედი უფრო გავრცელებული დამხვდა. მე ვიქნები თქვენი კულტურის ელჩი, მე მექნება მოლაპარაკებები თურქეთთან, რომ ტაო–კლარჯეთი კიდევ უფრო განვითრდეს. ასვე რელიგიური ტურიზმი უნდა განვავითაროთ აქ, მომლოცველები უნდა იყვნენ, გაიარონ მაგალითად წმინდა ნინოს გზა, ამაზეც უნდა ვიფიქროთ ყველამ ერთად.

ზურაბიშვილმა, ისევე როგორც ნინოწმინდაში, ორმაგი მოქალაქეობის მნიშვნელობის შესახებ ახალციხეშიც ისაუბრა: „ორმაგი მოქალაქეობა მნიშვნელოვანია, რადგან ყველა ევროპულ ქვეყანაშია ასეა, ამისთვის დავიწყე ბრძოლა პარლამენტში. ჩვენი ინტერესი უნდა იყოს რომ მოქალაქეები არ დავკარგოთ. მე ვიქნები თქვენი უფლებების დამცველი ქვეყნის შიგნით და გარეთ. ვიქნები დამოუკიდებელი პრეზიდენტი კრიტიკოსი, რომელიც ზუსტად მიიტანს მთავრობამდე პრობლემებს და არ ვიქნები მთავრობის მოქიშპე“.

სცენიდან სიტყვით მიმართა სალომე ზურაბიშვილს სამცხე–ჯავახეთის უნივერსიტეტის რექტორმა მაკა ბერიძემ: "თქვენ მოდიხართ ისტორიიდან, ჩვენი არჩევანი დღეს ევროპაა, მნიშნველოვანია ის, რომ თქვენ მოდიხართ ევროპული განათლებით და პროფესორი ხართ ევროპული უნივერსიტეტის. ევროპული განათლება უალტერანტივო პერსპექტივაა ჩვენი ქვეყნის განვითარებისთვის. ასევე, თქვენ მოდიხართ ემიგრაციიდან, თქვენი გზავნილია დაბრუნდითო საქართველოში, სამშობლოში დაბრუნება გვიანი არასდროს არ არის".

ახალციხეში შეხვედრის დასრულების შემდეგ ზურაბიშვილი ამომრჩევლებს ადიგენსა და ბორჯომში შეხვდება. გუშინ, ორ ოქტომბერს მან შეხვედრები გამართა ნინოწმინდაში, ახალქალაქსა და ასპინძაში.


[sknews.ge]